अंधेरीजवळील पश्चिम द्रुतगती महामार्गावर सोमवारी सकाळी प्रचंड वाहतूक कोंडी झाल्याचे पाहायला मिळाले. अंधेरी उड्डाणपुलावर असलेल्या गॅन्ट्री गर्डर पाडण्याचे काम मध्यरात्रीपासून सुरू होते. त्यामुळे उड्डाणपूल बंद ठेवण्यात आल्याने पुलाखालील वाहतूक ठप्प झाली होती.

दरम्यान वाहतूक पोलिसांनी काही दिवसांपूर्वी अधिसूचना जारी केली होती की 14 ऑगस्टच्या मध्यरात्री 12 ते 6 दरम्यान उड्डाणपूल कामामुळे वाहतुकीसाठी बंद असेल. मात्र काम उशिरापर्यंत सुरू असल्याने रस्त्यावर वाहतूक कोंडी पाहायला मिळाली.

सोमवार असल्याने बहुतांश मुंबईकर बोरिवली येथून मुंबईकडे कार्यालयात जाण्यासाठी निघाल्याने रस्त्यावरील वाहतूक कोंडीला सामोरे जावे लागले. तासभर हे काम चालणार असून लवकरच हा उड्डाणपूल वाहतुकीसाठी खुला होणार असल्याचे सूत्रांनी सांगितले.