मुंबई ः कर्करोगाला आळा घालण्यासाठी घरा-घरात सर्वेक्षण सुरू करण्यात आले आहे. राज्यातील १४ जिल्ह्यांमध्ये राज्य सरकारच्या आरोग्य विभागामार्फत केमोथेरपी उपचार दिले जात आहेत. लवकरच कोल्हापूर आणि उस्मानाबाद जिल्ह्यातही केमोथेरपी उपचार सुरू होणार असून त्यानंतरच्या टप्प्यात ठाणे, रायगडसह सात जिल्ह्यांत हे उपचार सुरू होणार असल्याची माहिती आरोग्यमंत्री राजेश टोपे यांनी दिली.

महत्वाचे ः #HopeofLife : कर्करोगावर आयुर्वेदिक उपचाराबाबत टाटा रुग्णालयात अभ्यास

राज्याच्या १४ जिल्ह्यांतील केमोथेरपी विभागामध्ये आतापर्यंत २८०० कर्करोग रुग्णांवर उपचार करण्यात आले आहेत. सध्या कोल्हापूर आणि उस्मानाबाद जिल्ह्यातील डॉक्‍टर आणि परिचारिकांना प्रशिक्षण देण्यात येत असून लवकरच या जिल्ह्यांमध्ये केमोथेरपी केंद्र सुरू होईल. त्यानंतर ठाणे, रायगड, अहमदनगर, परभणी, हिंगोली, बुलडाणा, वाशिम या जिल्ह्यांतील डॉक्‍टर आणि परिचारिकांचे प्रशिक्षण सुरू करण्यात येणार आहे.

’कॅन्सर वॉरियम’तर्फे ३२०० शस्त्रक्रिया
टाटा कर्करोग रुग्णालयात प्रशिक्षण घेतलेले डॉक्‍टर आणि खासगी डॉक्‍टरांनी कॅन्सर वॉरियर संघटनेची स्थापना केली आहे. गावपातळीवर कर्करोगाची मोफत तपासणी केली जात आहे. सध्या २३ जिल्ह्यांमध्ये ही तपासणी केली जात आहे. याअंतर्गत गत तीन वर्षांत ४० हजार रुग्णांची तपासणी करण्यात आली असून ३२०० शस्त्रक्रिया केल्याचे आरोग्यमंत्र्यांनी  सांगितले.

हे वाचा ः #HopeOfLife : जाणून घेऊया केमोथेरपी उपचारपद्धतीबाबत..

जनआरोग्य योजनेतून आठ लाख कर्करुग्णांवर उपचार

• राज्यात कर्करोगाचे निदान व उपचार करण्यासाठी आरोग्य विभागामार्फत विविध उपाययोजना केले जात असून महात्मा फुले जनआरोग्य योजनेच्या माध्यमातून आतापर्यंत सुमारे ८ लाख कर्करुग्णांवर उपचार करण्यात आले आहेत, अशी माहिती आरोग्यमंत्री राजेश टोपे यांनी दिली.
• सर्वसामान्यांना आवाक्‍याबाहेरील वैद्यकीय उपचारासाठी सुरू असलेल्या महात्मा जोतीबा फुले जनआरोग्य योजनेच्या माध्यमातून आतापर्यंत कर्करोगाशी संबंधित विविध उपचार सुमारे ८ लाख रुग्णांवर करण्यात आले आहेत. कर्करोगाला आळा घालण्यासाठी सध्या लोकसंख्या आधारित तपासणी कार्यक्रम सुरू आहे. सर्व जिल्ह्यांमध्ये आशा कार्यकर्ती व एएनएमच्या माध्यमातून प्रत्येक घराचे सर्वेक्षण केले जात अाहे.
• जागतिक तंबाखूविरोधी दिनाचे औचित्य साधून राज्यात ३१ मे ते ३० जून या कालावधीत मौखिक आरोग्य तपासणी मोहीम राबविण्यात आली. त्यामध्ये ८ लाख २७ हजार ९७२ रुग्णांची तपासणी करण्यात आली आहे. नाशिक आणि अमरावती येथील संदर्भ सेवा रुग्णालयातही कर्करोगावरील उपचार सुविधा दिल्या जात असल्याचे आरोग्यमंत्र्यांनी सांगितले.