डोंबिवली: 15 ऑगस्टपासून कोविड लसीचे (covid vaccination) 2 डोस घेवून 14 दिवस पूर्ण झालेल्या नागरिकांना रेल्वेने प्रवास (railway travel) करण्याची संधी मिळणार आहे. रेल्वे पास (railway pass) वितरण प्रक्रियेत गतिमानता आणण्यासाठी तिकीट काऊंटर शेजारी केडीएमसीतर्फे (KDMC) स्वतंत्र मदत कक्ष उभारण्यात आला असून पालिकेचे प्रभागक्षेत्र अधिकारी सुहास गुप्ते हे सकाळी 6 पासून केंद्राच्या ठिकाणी हजर होते. सकाळी 6.30 वाजल्या पासून कोड स्कॅन करून घेऊन पालिकेचा शिक्का मारून घेण्यासाठी नागरिकांनी गर्दी केली होती.

काही नागरिक मोबाईल मधील सर्टिफिकेट दाखवत होते, काही नागरिकांचे क्यू आर कोड स्कॅन होत नसल्याने त्यांना पुन्हा पालिका लसीकरण केंद्रावर जाऊन योग्य सर्टिफिकेट घेऊन येण्याचा सल्ला दिला जात होता.

"महापालिका कार्य क्षेत्रातील डोंबिवली, ठाकुर्ली, कल्याण, टिटवाळा, आंबिवली, शहाड या 6 रेल्वे स्टेशनवरील तिकीट काऊंटरवर लसीकरण प्रमाणपत्राची आणि फोटो असणा-या शासकीय ओळखपत्राची (आधारकार्ड) पडताळणी करण्यासाठी महापालिका कर्मचारी तैनात आहेत. सकाळी 7 ते दुपारी 3 आणि दुपारी 3 ते रात्री 11 या वेळेत हे सुरू राहणार असून नागरिकांनी गर्दी न करता या सुविधेचा लाभ घ्यावा."'

- सुहास गुप्ते, ह प्रभागक्षेत्र अधिकारी