नेरळ : कर्जत तालुक्यातील वाकस येथे १०० एकर जमिनीवर उभ्या राहत असलेल्या विजय इस्टेट या गृहसंकुलात सदनिकांची नोंदणी केलेल्या शेकडो ग्राहकांची फसवणूक झाल्याचे उघड झाले. त्यातील काही ग्राहकांनी नेरळ पोलिस ठाण्यात तक्रारी दिल्या आहेत. त्यानुसार ‘विजय इस्टेट ग्रुप’चे संचालक अतीव गाला यांच्याविरुद्ध नेरळ पोलिस ठाण्यात फसवणुकीचा गुन्हा दाखल झाला आहे.

२०१३ पासून मुंबई मानखुर्द येथील ४४ वर्षीय डॉ. गजानन विनायक कागलकर यांनी ‘विजय ग्रुप हाऊसिंग प्रायव्हेट लिमिटेड’ची जाहिरातीवरून वाकस येथे उभ्या राहत असलेल्या गृहप्रकल्पात २०१७ मध्ये सदनिका घेण्याचा निर्णय घेतला. त्यासाठी त्यांनी प्रत्यक्ष बांधकामाची पाहणी केली. त्यानंतर त्यांनी त्यातील एक सदनिका सुमारे १७ लाख रुपयांना निश्चित केली.

ठाण्यातील कार्यालयात सदनिकेबाबत कागलकर यांचे विजय ग्रुपचे सुनील सोनी यांच्याशी चर्चा झाली. सुरुवातीला दहा हजार रुपयांची रक्कम बँकेच्या डेबिट कार्डमधून घेण्यात आली. त्यानंतर कर्जत येथील उपनिबंधक कार्यालयात ऑगस्ट २०१७ मध्ये सदनिकेची नोंदणी झाली. या सदनिकेसाठीची उर्वरित रक्कम हप्त्यांद्वारे देण्याचे निश्चत झाले.

त्यानुसार कागलकर यांच्या खात्यातून ही रक्कम वळती केली जात होती. २०१८ मध्ये या गृहप्रकल्पाचे काम बंद झाले. त्याची माहिती मिळताच कागलकर यांनी चौकशी केली असता वाकस येथील गृहप्रकल्पात हजारांहून अधिक ग्राहकांनी चर्चगेट येथील ‘रेरा’ कार्यालयात तक्रारी देण्यात आल्याचे स्पष्ट झाले. रेरा न्यायालयाने संचालक अतीव गाला यांना संबंधित सर्व सदनिका धारक यांना त्यांनी नोंदणी केलेली घरे द्यावीत वा त्यांची रक्कम व्याजासह परत करण्याचे आदेश दिले. मात्र, गेल्या वर्षभरात ‘विजय ग्रुप हाऊसिंग लिमिटेड’कडून एकाही सदनिकाधारकास रक्कम परत मिळालेली नाही.

१२०० घरांची नोंदणी

विजय इस्टेटच्या वाकस येथील गृह प्रकल्पात ८००० सदनिका बांधल्या जाणार होत्या, त्यातील १२०० घरांची नोंदणी झाल्याची माहिती मिळत आहे. त्या सर्वांचीही फसवणूक झाल्याचे तक्रारींवरून स्पष्ट झाले आहे.