डोंबिवली - चारित्र्याच्या संशयावरून पतीने पत्नीवर चाकूने हल्ला करत तिला गंभीर जखमी केल्याची धक्कादायक घटना डोंबिवलीत घडली आहे. जखमी महिलेला उपचारासाठी मुंबईतील सरकारी रुग्णालयात हलविण्यात आले आहे. जखमी सुरेख हिवाळे हिची प्रकृती गंभीर असल्याचे बोलले जात आहे. याप्रकरणी मानपाडा पोलीस ठाण्यात गुन्हा दाखल करण्यात आला असून, सुरेखा हिचा पती राजू हिवाळे याचा पोलीस शोध घेत आहेत.

डोंबिवली पूर्वेकडील नांदिवली टेकडी परिसरात राजू आणि सुरेखा हिवाळे हे आपल्या दोन मुलांसह राहतात. दोन मुले जन्माला येईपर्यंत संसाराचा गाडा सुखात चाललेला असतानाच हिवाळे दाम्पत्यामध्ये वितूष्ट आले. राजू हा पत्नी सुरेखा हिच्या चरित्र्यावर कायम संशय घेत असल्याने दोघांमध्ये वारंवार वाद होत असत. सोमवारी पहाटेच्या सुमारास याच कारणावरून दोघांमध्ये वाद झाला.

हा वाद विकोपाला गेल्यानंतर संशयाचे भूत मानगुटीवर बसलेल्या राजू याने स्वयंपाकघरातील भाजी चिरण्याच्या चाकूने सुरेखावर हल्ला चढविला. पोटावर सपासप वार झाल्याने सुरेखा रक्ताच्या थारोळ्यात पडली. हे पाहून राजूने तेथून पळ काढला. पहाटेची वेळ असल्याने सर्वत्र शांतता होती. अशा वेळी सुरेखाच्या ओरडण्याचा आवाज ऐकून शेजारच्या रहिवाश्यांनी हिवाळे यांच्या घराकडे धाव घेतली.

रक्ताच्या थारोळ्यात पडलेल्या सुरेखाला उचलून केडीएमसीच्या शास्त्रीनगर रूग्णालयात दाखल केले. तथापी प्रकृती अधिकच चिंताजनक झाल्यामुळे तिला तात्काळ मुंबईतील सरकारी रुग्णालयाकडे हलविण्यात आले. याच दरम्यान जखमी सुरेखाने दिलेल्या जबानीतून पतीने केलेल्या हल्ल्याचे कारण स्पष्ट झाले.

याप्रकरणी हिवाळे यांच्या मुलाने दिलेल्या तक्रारीनुसार मानपाडा पोलिसांनी गुन्हा दाखल केला आहे. सुरेखाला संपविण्याचा हेतूने केलेल्या हल्ल्यानंतर राजू पसार झाला असून त्याला शोधून काढण्यासाठी पोलिसांनी तपासचक्रांना वेग दिला आहे.