अलिबाग: तालुक्‍यातील पोयनाड पोलिस ठाण्यापासून हाकेच्या अंतरावर असलेल्या भैरवनाथ मंदिरातील मूर्तीची मंगळवारी (ता.17) विटंबना करण्यात आली. लक्ष्मी-नारायण मंदिरातही असाच प्रकार घडला आहे. त्याचे तीव्र पडसाद आज उमटले. या घटनेनंतर स्थानिकांनी अलिबाग मार्गावर रास्ता रोको केले. बाजारपेठेतही बंद पुकारला. या प्रकरणातील संशयित आरोपीला काही नागरिकांनी पकडून पोलिसांच्या ताब्यात दिले आहे. मात्र त्याने हे कृत्य का केले, ते समजू शकले नाही. 

पोयनाड बाजारपेठेमध्ये अग्रवाल समाजाचे लक्ष्मी-नारायणाचे मंदिर आहे. त्याच्या बाजूलाच भैरवनाथ मंदिर आहे. गावातील रहिवासी राहुल अग्रवाल हे सकाळी दहा वाजता लक्ष्मी-नारायण मंदिरात दर्शनासाठी आले होते. त्या वेळी त्यांना मूर्ती अस्ताव्यस्त पडलेल्या दिसल्या. मंदिरात आगही लागली होती. या वेळी पळण्याचा प्रयत्न करणाऱ्या व्यक्तीला ग्रामस्थांनी पकडून पोलिसांच्या ताब्यात दिले.

एक्स्प्रेस- वेवरील टोलवसुलीला उच्च न्यायालयात आव्हान

या घटनेची माहिती पोयनाड पोलिसांना दिली. परंतु ते वेळेवर घटनास्थळी आले नाहीत, असा आरोप आहे. पोलिसांच्या विरोधात रास्ता रोको आंदोलन केले. बाजारपेठही बंद ठेवण्यात आली. 

अपर पोलिस अधीक्षक सचिन गुंजाळ, सहायक पोलिस निरीक्षक अजित शिंदे यांनी काही वेळानंतर घटनास्थळी धाव घेतली. गुन्हा दाखल करण्याचे आश्वासन दिल्यावर भाविक शांत राहिले. काही वेळ या परिसरात तणावाचे वातावरण निर्माण झाले. कायदा व सुव्यवस्था बिघडण्याची भीती निर्माण झाली होती. 

संशयिताचे नाव भगवान 
मूर्तींच्या विटंबना प्रकारानंतर पोयनाड परिसरात कडेकोट बंदोबस्त ठेवण्यात आला. 
जाळपोळ आणि नुकसान करणारी संशयित व्यक्ती पश्‍चिम बंगाल येथील रहिवासी आहे. त्याचे नाव भगवान असे आहे. तो पोयनाड परिसरातील एका पोल्ट्रीमध्ये काम करीत आहे.