मुंबई: मुंबई पोलिसांनी अंधेरी सब वे (Andheri sub way) बद्दल अत्यंत महत्त्वाचा निर्णय घेतला आहे. पावसाळ्यात रात्रीच्यावेळी वाहतुकीसाठी अंधेरी सब वे बंद राहणार आहे. पश्चिम उपनगरचे पोलीस उप आयुक्त सोमनाथ घार्गे यांनी त्यांना दिलेल्या अधिकारांचा वापर करुन रात्रीच्या वेळी अंधेरी सब वे वाहतुकीसाठी बंद करण्याचा निर्णय घेतलाय. (In rainy season Andheri sub way in night time will close for all type of traffic movements)

पावसाळ्यात अंधेरी सब वे मध्ये मोठ्या प्रमाणात पाणी साचते. या पाण्याचा अंदाज न आल्याने अनेकदा वाहनचालक या ठिकाणी अडकून पडतात. त्यावेळी गाडीत पाणी जाऊन जीवित हानी होण्याची शक्यता नाकारता येत नाही. म्हणूनच मुंबई पोलिसांनी अंधेरी सब वे तून रात्रीच्यावेळी प्रवास बंद करण्याचा निर्णय घेतला आहे.

नागरिकांची गैरसोय होऊ नये म्हणून बाळासाहेब ठाकरे उ्डडाण पूल, मिलन सब वे, गोपगोपाळ कृष्ण गोखले उड्डाणपुलाचा वापर पर्यायी वाहतूकीसाठी करण्याच्या सूचना वाहतूक विभागाकडून करण्यात आली आहे. आज रात्रीपासून ते ३० सप्टेंबरपर्यंत रात्री १० ते सकाळी ६ या वेळेत अंधेरी सब वे वाहतुकीसाठी बंद राहणार आहे.