मुंबई: "नरेंद्र मोदी यांच्या सरकारला सात वर्ष (seven years modi govt) पूर्ण झाली आहेत. देशासाठी अजून बरचं काही करायचं बाकी आहे. आज देश चाललाय. पण मागच्या साठ वर्षातला लेखाजोखा पाहिला, तर पंडित नेहरुंपासून ते राजीव गांधींच्या पुण्याईवर हा देश चाललाय" असे शिवसेना नेते आणि खासदार संजय राऊत (sanjay raut) म्हणाले. (In seven years modi govt didnt do anything new sanjay raut )

मोदी सरकारला सात वर्ष पूर्ण झाल्याच्या पार्श्वभूमीवर ते माध्यमांशी बोलत होते. "मागच्या सात वर्षात नवीन काही झालेलं नाही. पण आपण अपेक्षा करु शकतो. अपेक्षा ठेवली पाहिजे. सरकारला लोकांनी बहुमताने निवडून दिलय. याचा अर्थ लोकांचा सरकारवर विश्वास आहे" असे राऊत म्हणाले.

"आजही देशात बेरोजगारी, महागाई आहे. कोरोनानंतर अराजकता कायम आहे. लोकांच्या मागण्या कमी असतात. सर्वांना अदानी, टाटा, बिर्ला, अंबानी बनायचे नाही. फक्त रोजी-रोटी मिळाली पाहिजे, त्यातही लोक खूश होतात. मोदी सरकारने आत्मचिंतन केलं पाहिजे, मागच्या सात वर्षात जनतेला हे मिळालय का? यावर भरपूर काम करण्याची गरज आहे" असे संजय राऊत यांनी सांगितले.

"भ्रष्टाचाराचे आरोप लागले नाहीत ही चांगली गोष्ट आहे. परंतु राहुल गांधी यांनी या काळात अनेक भ्रष्टाचाराचे मुद्दे उपस्थित केले त्याला कोणीही उत्तर दिलेलं नाही. राहुल गांधी वरिष्ठ नेते आहेत. काँग्रेसचे माजी अध्यक्ष आहे. विरोधी पक्षाचे नेते आहेत. राहुलजी सांगतायत ते गांभीर्याने ऐकलं पाहिजे" असे संजय राऊत म्हणाले.