उल्हासनगर : महानगरपालिकेत आज दिव्यांग प्रतिनिधींसोबत झालेल्या बैठकीत आयुक्त डॉ.अझिझ शेख यांनी उल्हासनगरातील 2199 दिव्यांगांच्या पेन्शनमध्ये 700 रुपयांची वाढीव गिफ्ट देण्याचा निर्णय घेतला आहे.यापुढे दिव्यांगांना 1500 वरून 2200 रुपये मिळणार आहेत.आयुक्तांच्या या निर्णयामुळे दिव्यांग सुखावून गेले असून ऑगस्ट महिन्यापासून पेन्शनची रक्कम त्यांच्या बँक खात्यात जमा करण्यात येणार आहे.

शहरातील दिव्यांगांच्या पेन्शनमध्ये वाढ करावी,प्रलंबित प्रश्न मार्गी लावावेत,विविध सुविधा देण्यात याव्यात आदी मागण्या दिव्यांग प्रतिनिधींनी आयुक्त डॉ.अझिझ शेख यांच्याकडे केल्या होत्या.त्यानुसार डॉ.शेख,अतिरिक्त आयुक्त जमीर लेंगरेकर,उपायुक्त डॉ.सुभाष जाधव,उपमुख्य लेखापरीक्षक विलास नागदिवे,लेखाधिकारी संजय वायदंडे,दिव्यांग विभागप्रमुख राजेश घनघाव,वाहन विभागप्रमुख विनोद केणे,मालमत्ता विभागप्रमुख अलका पवार,जनसंपर्क अधिकारी छाया डांगळे,दिव्यांग प्रतिनिधी अशोक भोईर,सचिन सावंत,स्वप्निल पाटील,नरेश गायकवाड,रेहाना कुरेशी,राजेश साळवे,टिकम उदासी,निलेश जाधव,शैलेश तिवारी यांची बैठक पार पडली.त्यात डॉ.अझिझ शेख यांनी यापूर्वी मिळणाऱ्या दिव्यांगांच्या 1500 रुपये पेन्शनमध्ये 700 रुपयांची वाढ जाहीर केली आहे.

यासोबतच सर्व दिव्यांगांना ओळखपत्र देण्यात येणार असून त्यामुळे त्यांना उल्हासनगर महानगरपालिका परिवहन सेवेच्या बसमधून मोफत प्रवासाची सुविधा उपलब्ध होणार आहे.व्यायामशाळा,बेघर दिव्यांगासाठी वेगळे भवन व रात्र निवारा केंद्र उभारण्यात येणार असून व्यवसायासाठी चालना देण्यात येणार आहे.तसेच रोजगार निर्मतीच्या दृष्टीने महापालिका अंतर्गत शौचालयामध्ये देखभालीकरीता दिव्यांग व्यक्तीची निवड करण्यात येणार आहे.