ठाणे - गणेश विसर्जनाच्यावेळी विसर्जन घाटावर गर्दी होऊ नये यासाठी ठाणे महानगरपालिकेच्यावतीने महापालिकेच्या डीजीठाणे प्रणालीच्या माध्यमातून ऑनलाईन टाईमस्लॉट बुकींगची व्यवस्था सुरु करण्यात आली आहे. ठाणेकरांनी या मोहीमेला उत्तम प्रतिसाद दिला असून दोन दिवसांत दोन हजाराहून अधिक ठाणेकरांनी त्यावर पूर्वनोंदणी करुन गणेश विसर्जन स्थळाची आणि वेळेची निश्चिती केली आहे. 

नोकरीवरचं विघ्न 'विघ्नहर्त्यानेच' टाळलं, तरुणांनी असा केला व्यवसायाचा 'श्रीगणेशा'

कोरोना संक्रमण काळात सुरक्षित वावराच्या नियमांचे पालन करुन भाविकांनी गणेश विसर्जन करावे यासाठी ठाणे महानगरपालिकेच्यावतीने यावर्षी भाविकांना विसर्जन घाटावर येण्याच्या वेळेची पूर्वनोंदणी करण्याचे आवाहन करण्यात आले आहे. 14 ऑगस्टला सायंकाळपासून ही सेवा महानगरपालिकेच्या अधिकृत संकेतस्थळावर उपलब्ध करुन देण्यात आली आहे. गणेश विसर्जन वेळेची पूर्वनोंदणी करण्यासाठी शहरातील 13 कृत्रीम तलाव आणि 20 मूर्ती स्वीकृती केंद्राची नावे, प्रभागसमिती, वेळ, ठिकाण अशी माहिती देण्यात आली असून नागरिकांनी ही माहिती भरुन आपली वेळ निश्चित करावी असे आवाहन पालिका आयुक्त डॉ. विपीन शर्मा यांनी केले होते. 20 हजार 555 वेळेचा पहिली यादी देण्यात आली आहे. दोन दिवसांतच या यादीतील वेळेची 2 हजार 393 वेळांची नोंदणी भाविकांनी केली आहे. तारखेनुसार यामध्ये नविन वेळांची यादीही महापालिका प्रशासनाकडून जाहीर केली जाणार आहे. 

...अन् स्वातंत्र्यदिनी पाटोळ ग्रामस्थांची पाण्यासाठी वणवण थांबली; जलजीवन मिशनद्वारे थेट नळजोडणी

ठाणेकरांचा या उपक्रमास चांगला प्रतिसाद मिळत आहे. कोरोना संक्रमण काळात सुरक्षित वावरात गणेश विसर्जन पार पडावे यासाठी भाविकांनी महापालिकेस सहकार्य करावे. त्यासाठी महानगरपालिकेच्या अधिकृत डिडीठाणे डॅशबोर्ड लिंकवर जाऊन गणेश विसर्जन बुकींग हा पर्याय निवडून आपल्या प्रभागातील कृत्रीम तलावांची किंवा मुर्ती स्वीकृती केंद्रांची यादी बघून मूर्ती विसर्जनासाठीची जवळच्या विसर्जन स्थळावरील आपली वेळेची नोंद बुक करावी असे आवाहन पालिकेच्यावतीने करण्यात येत आहे.

-----------------------------------------------

( संपादन - तुषार सोनवणे  )