मुंबईत गुरुवारपासून सुरू झालेल्या विरोधकांच्या 'इंडिया' आघाडीच्या बैठकीचा आज दुसरा दिवस आहे. आज होणाऱ्या इंडियन नॅशनल डेव्हलपमेंटल अलायन्स (इंडिया) नेत्यांच्या औपचारिक बैठकीत आघाडीचे समन्वयक आणि लोगोबाबत निर्णय घेतला जाऊ शकतो. दरम्यान इंडियाची आजची तिसरी बैठक संपल्यानंतर चौथी बैठक चैन्नईत घेण्याचे मुख्यमंत्री स्टॅलिन यांनी सुचवले आहे.

दरम्यान काल मुंबईतील हॉटेल ग्रँड हयात येथे पहिल्या दिवसाच्या बैठकीत ११ सदस्यीय समन्वय समिती स्थापन करण्यावर एकमत झाले. ठरल्या प्रमाणे विविध समन्वय समिती या नेमल्या जातील मात्र त्यात प्रत्येक पक्षातील व्यक्तीला स्थान मिळेलच असे नाही याची स्पष्टताही केली गेली. तसेच आणखी काही पक्ष 'इंडिया' आघाडीत सामील होण्याच्या वाटेवर असल्याने जागा वाटपाबाबत आज पुर्णतः निर्णय होणार नसल्याची माहिती देखील समोर आली आहे.

ज्या राज्यात ज्या पक्षांची ताकद आहे त्यांना जागा वाटपात प्राधान्य राहिल. मात्र जागा वाटपावेळी इंडियातील इतर घटक पक्षांचाही विचार केला जाणार असल्याचे सांगण्यात आले आहे. मुंबईत सुरू असलेल्या या बैठकीत कांग्रेस अध्यक्ष मल्लिकार्जुन खरगे, सोनिया गांधी, बिहार चे मुख्यमंत्री नीतीश कुमार, अरविंद केजरीवाल यांच्यासह इतर 28 पक्षांचे ६० हून अधिक नेते सहभागी झाले आहेत.