मुंबईत वाय.बी.सेंटर येथे राष्ट्रवादी काँग्रेसची महत्त्वाची बैठक होत आहे. राष्ट्रवादी काँग्रेसचे अध्यक्ष शरद पवार बैठकीसाठी येथे पोहोचले आहेत. महाविकास आघाडी सरकारमधील मंत्री हसन मुश्रीफ, अनिल देशमुख, जयंत पाटील बैठकीसाठी येथे दाखल झाले आहेत. निलंबित पोलीस अधिकारी सचिन वाझे यांना एनआयएकडून झालेल्या अटकेच्या मुद्दावर या बैठकीत चर्चा होण्याची शक्यता आहे. 

आतापर्यंत विरोधी पक्षात असलेल्या भाजपाने सचिन वाझे प्रकरणावरुन शिवसेनेला पद्धतशीरपणे लक्ष्य केले. शिवसेनेची विश्वासहर्ता कमी करुन प्रतिमा डागाळण्याचा प्रयत्न केला. त्यानंतर आज अचानक माध्यमांनी राष्ट्रवादी काँग्रेस अनिल देशमुख यांना गृहमंत्रीपदावरुन दूर करणार असल्याच्या बातम्या चालवल्या.. 

मुकेश अंबानी यांच्या निवासस्थानाबाहेर सापडलेली स्फोटकांनी भरलेली कार, त्यानंतर मनसुख हिरेन यांचा झालेला मृत्यू आणि सचिन वाझेंना झालेली अटक यामध्ये पोलीस खात्याचं नाव खराब झालं. राज्याचं गृहखातं राष्ट्रवादी काँग्रेसकडे आहे. राज्याच्या गृहखात्याचं हे अपयश असल्याची टीका विरोधकांकडून सुरु आहे. 

दरम्यान अनिल देशमुखांकडून गृहखात काढून घेणार असल्याची चर्चा होती. पण आघाडी सरकारमधील मंत्री जयंत पाटील यांनी असा कोणताही निर्णय होणार नसल्याचं स्पष्ट केलं. सरकार कोणालाही पाठिशी घालत नाही. कोणतेही अंदाज बाधण्याची शक्यता नाही. खातेबदल होण्याची कोणतीही शक्यता नाही, असे  जयंत पाटील यांनी स्पष्ट केले.