ठाणे - एसटी महामंडळाला लागलेले समस्यांचे ग्रहण काही पाठ सोडत नसल्याचे दिसून येत आहे. त्यातच आता, एसटी महामंडळाच्या कळवा विभागीय कार्यशाळेत कर्मचाऱ्यांचा तुटवडा असून ४०० कर्मचाऱ्यांचे काम हे १०० कर्मचाऱ्यांना करावे लागत आहे. त्यामुळे त्याचा परिमाण कर्मचाऱ्यांवर होत असून त्यांच्यावर कामाचा अतिरिक्त ताण पडत आहे. यासंदर्भात कर्मचाऱ्यांनी भाजपचे आमदार संजय केळकर यांच्याकडे धाव घेत, पत्रव्यवहार करीत समस्या सोडविण्याची मागणी केली आहे.

एसटी महामंडळाचे कळवा विभागीय कार्यशाळेचे बांधकाम हे २० वर्षे जून असून पूर्वी याठिकाणी ४०० च्या आसपास कर्मचारी कार्यरत होते. परंतु २०१७ नंतर नवीन कर्मचाऱ्यांचीच भरतीच न झाल्याने ४०० कर्मचाऱ्यांचे काम १०० कर्मचाऱ्यांना करावे लागत आहे.

या ठिकाणी आरटीओ पासीगंच्या गाडयांची कामे तसेच ८ डेपोच्या गाडयांच्या रिपेअरिंगचे कामे, बॉडीची कामे, पेंटींगची कामे, तसेच इंजिन गेअरबॉक्स, क्लचप्लेट, क्रशर प्लेट, पिनीअन, जॉईंटस रेडीएटर, पाटे, वेल्डींग, अपोहस्टर खाते, इलेक्ट्रीशिअनची कामे, फ्रंट अ‍ॅक्सल ही सर्व रिपेअरिंगचे कामे जवळपास ७०० गाडयांची कामे केली जातात ही कामे करत असतांना कर्मचा-यांना अनेक समस्या भेडसावत आहेत.

आरटीओ पासिंग गाडयांची कामे ३ दिवसाचे काम एका दिवसामध्ये सक्तीने करुन घेतले जाते. नाही केल्यास प्रशासकीय दबाव टाकला जातो. म्हणजेच बदली करून चार्जशिट घेऊन पंचिंग कार्ड जमा करुन अर्धा दिवसाचा पगार कापुन अशा धमक्या देऊन कर्मचा-यांची मानसिक खराब केली जाते.

हेवी वर्क असल्याने ५० टक्के कर्मचारी हे शारिरीक व्याधीनी त्रस्त आहेत. व काही कर्मचारी नोकरी सोडण्याच्या तयारीत आहेत. संपुर्ण वर्कशॉपचे बांधकाम पडण्याच्या मार्गावर आहे. त्यामुळे ९० ते १०० कर्मचा-यांचा जिव धोक्यात आहे, अशी समस्या कर्मचाऱ्यांनी भाजप आमदार संजय केळकर यांच्याकडे मांडली.

टॉयलेट, बाथरुम अस्वच्छ व पडक्या स्थितीत आहे व तसेच वर्कशॉपच्या आवारामध्ये साफसफाई केली जात नाही, अपघात झाल्यास प्रथमोपचार पेटी व रुग्णवाहिकेची सोय नाही. अत्याधुनिक यंत्र सामुग्री तसेच हायड्रॉलिक जाक उपलबध नाहीत, आदी समस्या कर्मचाऱ्यांनी मांडल्या. या समस्या सोडविण्यासाठी संबधीत यंत्रणेकडे पाठपुरावा केला जाईल आणि कर्मचाऱ्यांना न्याय दिला जाईल.

- संजय केळकर, आमदार, भाजप.