भाजपचे नेते किरीट सोमय्या यांच्या रडारवर आता नवीन मंत्री आहेत. समाजकल्याण मंत्री धनंजय मुंडे यांच्याशी संबंधित एका साखर कारखान्यावर सोमय्यांनी भ्रष्टाचाराचे आरोप केले आहेत. धनंजय मुंडे यांनी मृत व्यक्तीचे अंगठे घेऊन कारखान्यासाठी जमीन बळकावल्याचा आरोप त्यांच्यावर सोमय्यांनी केलाय.

नुकतीच सर्वोच्च न्यायालयात मुंडे यांच्याशी संबंधित जगमित्र साखर कारखान्याची सुनावणी पार पडली. यामध्ये कोर्टाने आश्चर्य व्यक्त केलंय. 2014 साली साखर कारखान्यावर खटला भरण्यात आला होता. त्यानंतर संपूर्ण प्रकरणावर स्टे आला होता.

ठाकरे सरकारचे समाजकल्याण मंत्री धनंजय मुंडे यांच्या साखर कारखान्याची चौकशी करण्याचे आदेश दिले पाहिजे. सुप्रीम कोर्टाने या प्रकरणावर आश्चर्य व्यक्त केलं आहे. ज्ञानोबा सिताराम कोळी हे १९८८ मध्ये मृत पावले. राज्य सरकारच्या डेथ सर्टिफिकेवर हीच तारीख आहे. मात्र, त्यांचा अंगठा 2010 साली घेतला आहे. जगमित्र साखर कारखान्यात अफरातफर झाली आहे, असा आरोप सोमय्यांनी केला.

या कोळी यांची जमीन मुंडेंनी 2010 साली विकत घेतली, आणि यावर त्यांचा अंगठा आहे. माणूस सृत पावल्यानंतर हे प्रकरण घडलंय, म्हणजे मोठा घोटाळा झाला आहे, असं सोमय्या म्हणाले. हे सर्व भ्रष्ट शरद पवारांचे शागिर्द असल्याचं त्यांनी म्हटलं. पुढील आठवड्यात या साखर कारखान्यासाठी मुंडे यांनी जमीन कशी बळकावली आहे, याचा खुलासा करण्यासाठी बीडला जाणार असल्याची घोषणाही त्यांनी केली.

या प्रकरणात एफआय आर दाखल झाली होती. फडणवीस सरकारच्या काळात हे झालं होतं. यानंतर पीडित परिवारातील दोघांनी माझी भेट घेतली. त्यांनी मला जमिनीच्या प्रकरणात अफरातफर झाल्याचं सांगितलं. यामध्ये भ्रष्टाचार झाला असल्याने धनंजय मुंडेंचा राजीनामा झाला पाहिजे, असा आग्रह सोमय्यांनी धरला.