पुण्याच्या जम्बो कोवीड रुग्णालयाच्या कामात भ्रष्टाचारासंदर्भात महापालिका आयुक्तांना निवेदन देण्यासाठी भाजप नेते किरीट सोमय्या पुण्यात आले होते. यावेळी त्यांच्यावर शिवसैनिकांनी आक्रमक होत हल्ला केला. परिस्थिती हाताबाहेर जाऊ लागल्याने सोमय्यांनी माघारी फिरण्याचा निर्णय घेतला.

मात्र, यावेळी पायऱ्यांवरून घसरल्याने त्यांनी दुखापत झाली. सध्या त्यांच्या डाव्या हाताला प्लास्टर आहे. आता सोमय्यांनी मुंबईत पोहोचून आणखी एक व्हिडीओ शेअर केला आहे. यामध्ये त्यांनी मुख्यमंत्र्यांचं षडयंत्र असल्याचा आरोप केला असून ते राज्यपाल आणि गृहमंत्र्यांची भेट घेणार आहेत. (Kirit Somaiya attacked bye Shivsena in Pune)

'माझे हातपाय तोडायला सांगितले'

मनसुख हिरेन नंतर किरीट सोमय्यांची हत्या करण्याचा ठाकरे सरकारचा प्लॅन होता. पुण्याच्या घटनेनंतर एक एक व्हिडीओ क्लिप्स समोर आल्या यानंतर हे सत्य समोर आलं आहे. माझे हातपाय तोडायला सांगितले होते. तरीही पुणे पोलीस संथ गतीने तपास करत आहेत. ठाकरेंच्या सरकारमधील घोटाळे बाहेर येणार म्हणून हे घाबरले आहेत. यामध्ये संजय राऊत, अनिल परब यांचा समावेश आहे. त्यामुळे माझ्यावर हल्ला झाला, असं सोमय्या म्हणाले. मोदी सरकारने पुरवलेल्या सुरक्षेमुळे मी वाचलो, असं त्यांनी म्हटलं.

गुन्हा दाखल पण अटक कोणालाही नाही

सोमय्यांवर हल्ला झाल्यानंतर त्याची दखल घेत गुन्हा दाखल करण्यात आला आहे. मात्र, अद्याप कोणाला अटक करण्यात आलेलं नाही. पण, पुढील कारवाईसाठी पथके रवाना केल्याची माहिती पोलिसांनी दिली. याप्रकरणी शिवाजीनगर पोलीस ठाण्यात प्रशांत लाडे (वय ३०) यांनी तक्रार दिली आहे.

त्यानुसार, भादवी कलम १४३, १४७, १४९, ३४१, ३३६, ३३७, ३२३, ५०४ तसेच मु.पो.अॅक्ट कलम ३७(१) सह १३५ नुसार शहरअध्यक्ष संजय मोरे, पदाधिकारी चंदन साळुंके, किरण साळी, सुरज लोखंडे, आकाश शिंदे, रूपेश पवार, राजेंद्र शिंदे, सनि गवते यांच्यासह ६० ते ७० महिला व पुरूष कार्यकर्त्यांवर गुन्हा दाखल करण्यात आला आहे.