मुंबई: राष्ट्रवादी काँग्रेसचे नेते आणि प्रवक्ते नवाब मलिक (Nawab malik) यांनी क्रांती रेडकर (Kranti redkar) यांच्या बहिणीच्या ड्रग्ज प्रकरणावरुन (Drug case) समीर वानखेडे (Sameer wankhede) यांना कोंडीत पकडण्याचा प्रयत्न केला आहे. समीर वानखेडे यांनी यावर आपली बाजू मांडली आहे. आता क्रांती रेडकर यांनी सुद्धा या विषयावर भाष्य केलं आहे.

"नवाब मलिक यांनी जे टि्वट केलय, त्यावरुन प्रसारमाध्यमांना अनेक प्रश्न पडलेत हे मला ठाऊक आहे. या प्रकरणात माझ्या बहिणीला सातत्याने लक्ष्य केलं जातं आहे. आमच्या कायदेशीर टीमच्या सल्ल्यानुसार, हे प्रकरण न्यायालयात प्रलंबित असल्यामुळे यावर मत प्रदर्शन करणं, योग्य होणार नाही. माझी बहिण कायदेशीररित्या नवाब मलिक यांच्या टि्वटला उत्तर देईल. या केसशी समीर वानखेडे यांचा काही संबंध नाही" असे क्रांती रेडकरने म्हटले आहे.

समीर वानखेडे म्हणाले....

"क्रांती रेडकरच्या बहिणीवर जानेवारी २००८ मध्ये गुन्हा दाखल झाला असेल. मी सप्टेंबर २००८ मध्ये IRS झालोय. २०१७ साली माझे क्रांतीशी लग्न झाले आहे. मग २००८ च्या प्रकरणाशी माझा काय संबंध?"असं समीर वानखेडे यांनी म्हटलं आहे.