मुंबईतील प्रसिद्ध लालबागचा राजा सार्वजनिक गणेशोत्सव मंडळाने गणेशोत्सवात भाविकांनी अर्पण केलेल्या सोनं-चांदीच्या दागिन्यांचा भव्य लिलाव आयोजित केला होता. या लिलावात २ कोटी ३५ लाख १८ हजार रुपयांची विक्री झाली. गणेशभक्तांनी श्रद्धेने अर्पण केलेल्या या रकमेचा उपयोग मंडळाच्या विविध सामाजिक उपक्रमांसाठी केला जाणार आहे.
मुंबईतील लालबागचा राजा नवसाला पावणारा गणपती म्हणून ओळखला जातो. त्यामुळे गणेशोत्सवाच्या काळात फक्त मुंबईतून नव्हे, तर संपूर्ण राज्य आणि देशभरातून भाविक लालबागच्या राजाचं दर्शन घेण्यासाठी येतात. यंदा देखील गणेशोत्सवात भाविकांनी मोठ्या प्रमाणात दान केलं. या गणेशोत्सवात लालबागच्या राजाला दान म्हणून ५.६५ कोटी रुपये रोख, ४.१५ किलो सोनं आणि ६४.३२ किलो चांदी अर्पण करण्यात आली.
लालबागच्या राजाला भाविकांनी अर्पण केलेल्या दागिन्यांचा लिलाव आज पार पडला, ज्यात २ कोटी ३५ लाख १८ हजार रुपयांची विक्रमी विक्री झाली. यापूर्वी देखील लालबागच्या राजाच्या लिलावात मोठ्या प्रमाणात विक्री होत असते, मात्र यंदाची विक्री विशेष ठरली. हा लिलाव मंडळाच्या सामाजिक उपक्रमांमध्ये योगदान देणारा ठरेल.
लालबागचा राजा सार्वजनिक गणेशोत्सव मंडळाची स्थापना १९३४ साली मुंबईतील कोळी समाजाच्या मच्छीमारांनी केली होती. आज हा गणेशोत्सव देशातील सर्वात प्रतिष्ठित आणि लोकप्रिय उत्सवांपैकी एक आहे. यंदाच्या गणेशोत्सवात लालबागच्या राजाला ६६ किलो सोनं आणि ३२५ किलो चांदीच्या दागिन्यांनी सजवण्यात आलं होतं. याशिवाय, लालबागच्या राजाचा ४०० कोटी रुपयांचा विमा काढण्यात आला होता, जो देशातील एक मोठा विमा म्हणून ओळखला जातो.
लालबागच्या राजाच्या दर्शनासाठी दरवर्षी लाखो गणेशभक्त येतात. यावर्षीही पंडालाबाहेर २४ तास भक्तांची गर्दी होती. या गर्दीत अनेक मोठे नेते, फिल्म स्टार्स, आणि विविध क्षेत्रातील महत्त्वपूर्ण व्यक्ती सहभागी झाल्या होत्या. लालबागचा राजा हा मुंबईतील गणेशोत्सवाच्या उत्साहाचे प्रतीक आहे आणि त्याचे महत्त्व दिवसेंदिवस वाढतच आहे.
गेल्या १० दिवसांच्या गणेशोत्सवाचा समारोप १७ सप्टेंबरला झाला. भाविकांनी बाप्पाला भरभरून दान केले, ज्यात विशेषत: सोनं-चांदीची दानं महत्त्वाची ठरली. मंडळाने या सर्व दानाची मोजणी पूर्ण करून लिलावाची प्रक्रिया यशस्वीपणे पार पाडली.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.