मुंबई : नालेसफाईची कामे ११३ टक्के झाल्याचा दावा पालिकेने केला आहे. मात्र हा दावा खोटा असून आजही अनेक मोठ्या नाल्यात गाळ साचलेला आहे. याप्रकरणी आयुक्तांनी स्वतः लक्ष घालून अधिका-यांमार्फत नालेसफाईची कामे पूर्ण करून घ्यावीत. 'नालेसफाई की हात सफाई' अशी शंका उपस्थित करून पालिकेला चुना लावणाऱ्या कंत्राटदारांना काळ्या यादीत टाकावे, अशी मागणी पालिका विरोधी पक्षांनी केली आहे .
यंदा नालेसफाईच्या कामांबाबतचे टेंडर उशिराने काढण्यात आले. त्यामुळे नालेसफाईच्या कामांना उशिराने सुरुवात करण्यात आली. पालिका दरवर्षी या नालेसफाईच्या कामांवर कोट्यवधी रुपये खर्च करते. तरीही संबंधित अधिका-यांनी कंत्राटदारांशी संगनमत करून पालिका आयुक्तांना नालेसफाईची कामे ११३ टक्के झाल्याची खोटी माहिती दिली. त्यामुळे आजही नाल्यात ५-६ फूट इतका गाळ बाकी असल्याचा दावा पालिकेचे विरोधी पक्षनेते रवी राजा यांनी केला आहे.
आपण स्वतः २९ व ३० जून रोजी मुंबईतील काही मोठ्या नाल्यांची पाहणी केली. त्यावेळी नाल्यांची सफाई अर्धवट झाल्याचे व नाल्यांमध्ये अद्यापही गाळ बाकी असल्याचे रवी राजा यांनी आयुक्तांना पाठवलेल्या पत्रात म्हटले आहे.
नालेसफाई योग्यरीत्या झाली नसल्याच्या नागरिकांच्या तक्रारी आहेत. त्याची दखल घेऊन आपण स्वतः २९ व ३० जून रोजी सायन येथील प्रेमनगर नाला, गोवंडी येथील शिवाजी नगर नाला, वडाळा येथील कोरबा मिठागर नाला, कुर्ला येथील मिठी नदी, घाटकोपर येथील लक्ष्मीबाग नाला, घाटकोपर येथीलच सोमय्या नाला, अंधेरी येथील इंडियन ऑइल नाला, मालाड येथील वळनाई नाला, गोरेगाव येथील ओशिवरा नाला, कांदिवली येथील लालजीपाडा नाला, बोरिवली येथील गोराई नाला, वांद्रे, खेरवाडी येथील चमडावाडी नाला आदी नाल्यांची पाहणी केली. यावेळी, सदर नाल्यांमध्ये गाळाची पडताळणी करून पाहिले असता मोठ्या प्रमाणात गाळ बाकी असल्याचे निदर्शनास आल्याचे राजा यांनी म्हटले आहे.
पालिकेने ११३ टक्के नालेसफाईची कामे झाल्याचा दावा केला असेल तर प्रत्यक्ष पाहणीत नाल्यात मोठ्या प्रमाणात गाळ कसा असा सवाल त्यांनी केला आहे. नालेसफाईची कामे अर्धवट झाली असून कंत्राटदारांच्या 'हात की सफाई' प्रकरणी चौकशी करून दोषी कंत्राटदारांना त्याच्या कामाचे बील न देता, त्यांना काळ्या यादीत टाकण्यात यावे, अशी मागणीही राजा यांनी केली आहे.
leader of opposition of bmc asked question to city commissioner
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.