मुंबई : कोकणात (konkan) ढगाळ वातावरण तयार झाले असून हलक्या सरींची (Untimely rain) शक्यता वर्तवण्यात आली आहे. मुंबईसह (Mumbai) ठाणे, पालघर, रायगड, रत्नागिरी आणि सिंधुदुर्ग जिल्ह्यात हलक्या पावसाची शक्यता आहे. मराठवाडा, मध्य महाराष्ट्र आणि विदर्भात गडगडाटासह पावसाची (Rainfall alert) शक्यता व्यक्त करण्यात आली आहे.

पूर्वेकडील हवामानात बदल झाल्याने पावसाळी वातावरण तयार झाले आहे. ७ ते ९ मार्च, दरम्यान महाराष्ट्र, गुजरात, पूर्व राजस्थान आणि पश्चिम मध्य प्रदेशात विजांच्या कडकडाटासह काही ठिकाणी हलका मध्यम पाऊस पडण्याची शक्यता आहे. कोकणात ढगाळ वातावरण तयार झाले आहे. त्यामुळे हलक्या पावसाची शक्यता वर्तवण्यात आली आहे; तर मराठवाडा, मध्य महाराष्ट्र आणि विदर्भात गडगडाटासह पावसाची शक्यता हवामान विभागाचे शास्त्रज्ञ के. एस. होसाळीकर यांनी व्यक्त केली.

तापमानात वाढ

मुंबईतील कमाल तापमानात ही वाढ झाली आहे. सांताक्रूझ ३६.७, तर कुलाबा ३३.१ अंश सेल्सियस तापमानाची नोंद झाली. त्यामुळे दुपारी झळा सोसाव्या लागत आहेत. कमाल तापमानात वाढ झाली असून पुढील काही दिवस आणखी वाढ होण्याची शक्यता आहे. रात्री मात्र किमान तापमान सांताक्रूझ २१.० तर कुलाबा २१.६ अंश सेल्सियस किमान तापमान नोंदवण्यात आले. त्यामुळे रात्री काहीसा गारवा जाणवत आहे.