डोंबिवली - डोंबिवलीत आलेल्या अवकाळी पावसामुळे सोमवारी होणारी उद्धव ठाकरे यांची सभा रद्द करण्यात आली आहे. सायंकाळी पाऊस थांबला असला तरी सभेच्या ठिकाणी असलेले साउंड सिस्टीम, स्टेज भिजल्याने ही सभा रद्द करण्यात आली असल्याची माहिती आहे.

इंडिया आघाडी आणि महाविकास आघाडीच्या कल्याण लोकसभेच्या उमेदवार वैशाली दरेकर राणे यांच्या प्रचारासाठी डोंबिवली पश्चिम येथील भागशाळा मैदान येथे सोमवारी शिवसेना ठाकरे गटाचे पक्षप्रमुख उध्दव ठाकरे यांच्या प्रचार सभेचे आयोजन करण्यात आले होते. रविवारी राष्ट्रवादीचे अध्यक्ष शरद पवार यांनी भिवंडी लोकसभेचे उमेदवार सुरेश म्हात्रे उर्फ बाळ्या मामा यांच्या प्रचारासाठी कल्याण पश्चिम येथे सभा घेतली.

यानंतर सोमवारी उद्धव ठाकरे यांच्या सभेचे आयोजन वैशाली दरेकर यांच्या प्रचारासाठी करण्यात आले होते. मात्र सोमवारी दुपारी अचानक वादळी वाऱ्यासह अवकाळी पाऊस कल्याण डोंबिवली मध्ये पडला. अचानक आलेल्या पावसामुळे सभेच्या ठिकाणी असलेले सभा मंडप तसेच साउंड सिस्टीम भिजली आहे.

पावसास सुरवात झाली तेव्हाच उद्धव ठाकरे यांची सभा होणार का? याची चर्चा सुरू झाली. शरद पवार यांच्या सारखेच उद्धव ठाकरे देखील भर पावसात सभा घेतील असे शिवसैनिक बोलत होते. मात्र साऱ्यांचाच हिरमोड झालं आहे.

अवकाळी पडलेल्या मुसळधार पावसामुळे आणि खराब, अंधुक, वादळी वातावरणामुळे आयोजित महासभा रद्द करण्यात आली आहे. सर्व संबंधितांनी याची नोंद घ्यावी आणि आपापल्या पक्षातील, प्रभागातील सर्व पदाधिकारी आणि कार्यकर्ते यांना कळवावे अशी सूचना शिवसेना ठाकरे गटाकडून सांगण्यात आली आहे.

उमेदवारांना प्रचारासाठी आता अवघे 5 दिवस राहिले आहेत. त्यामुळे कल्याण लोकसभा मतदारसंघातील महाविकास आघाडीच्या उमेदवार वैशाली दरेकर यांच्यासाठी पक्ष प्रमुखांची रद्द झालेली सभा पुन्हा कधी होते यावर चर्चा सुरू झाली आहे.