मुख्यमंत्री उद्धव ठाकरे रुटीन चेकअपसाठी रुग्णालयात दाखल झाले आहेत. मुंबईतील एचएन रिलायन्स रुग्णालयात ते आपल्या नियमीत तपासणीसाठी दाखल झाले आहेत. मुख्यमंत्री उद्धव ठाकरे हे स्वत: गाडी चालवत रुग्णालयात आले होते.

उद्धव ठाकरे हे स्वत: गाडी चालवत रुग्णालयात आले होते, त्यांची प्रकृतीही उत्तम आहे. फक्त रुटीन चेकअपचा भाग म्हणून ते रुग्णालयात गेले आहेत. यापूर्वी मुख्यमंत्र्यांचं रुटीन चेकअप लीलावती रुग्णालयात होतं. मात्र उद्धव ठाकरे हे सध्या वर्षा बंगल्यावर असल्याने जवळचं रुग्णालय म्हणून, मुख्यंत्र्यांनी एचएन रिलायन्स रुग्णालय निवडलं असल्याचं महाविकास आघाडीमधील एका नेत्यानं सांगितलं.

चेकअप झाल्यानंतर तासाभरातच उद्धव ठाकरे माघारी परतले. यावेळी रुग्णालय परिसरात पोलिसांचा मोठा फौजफाटा तैनात करण्यात आला होता. रश्मी ठाकरे यांची कोरोना चाचणी पॉझिटिव्ह आली होती, त्यावेळी त्यांच्यावर याच रुग्णालयात उपचार झाले होते. त्यानंतर आता मुख्यमंत्री स्वत:ही रुटीन चेकअपसाठी याच रुग्णालयात पोहोचले.