मुंबई : विधान सभेचे हिवाळी अधिवेशन (Maharashtra Winter Assembly Session) आजपासून ( दि. 22 ) सुरु होणार आहे. या अधिवेशनात विरोधीपक्ष आक्रमक होण्याची शक्यता आहे. गेल्या आठवड्याभरात राज्यातील भरती घोटाळा प्रकरण चांगलेच गाजले आहे. याच आधारे विरोधक सत्ताधारी महाविकास आघाडीला कोंडीत पकडण्याची शक्यता आहे. त्यामुळे विरोधकांच्या कोंडीत पकडणाऱ्या प्रश्नांना प्रत्युत्तर देण्याची रणनिती ठरवण्यासाठी महाविकास आघाडीच्या आमदारांची अधिवेशन सुरु होण्यापूर्वी आज सकाळी 9 वाजता बैठक होणार आहे.

याचबरोबर अनेक विषयांवरुन विरोधपक्ष महाविकास आघाडी सरकारला कोंडीत पकडण्याची शक्याता आहे. ओबीसी आरक्षणाचा निर्णय राज्य सरकारच्या विरोधात गेला आहे. त्यातच केंद्राने इंम्पिरिकल डाटा राज्याला न देण्याने या विषयावरून विधानसभेत सत्ताधारी आणि विरोधकांमध्ये रणकंदन माजण्याची शक्यता आहे.

हिवाळी अधिवेशनात (Maharashtra Winter Assembly Session) विरोधकांच्या आरोपांना कोणत्या रणनितीने प्रत्युत्तर द्यायचे यासाठी महाविकास आघाडीच्या आमदारांची सकाळी 9 वाजता बैठक होणार आहे.

विरोधीपक्षनेते देवेंद्र फडणवीस यांनी काल चहापानावर बहिष्कार घालत हिवाळी अधिवेशन वादळी होणार असल्याचे संकेत दिले होते. याचवेळी त्यांनी यंदाच्या हिवाळी अधिवेशनात विरोधीपक्ष कोणत्या मुद्द्यांना हात घालणार याचीही झलक दिली होती. त्यांनी 12 आमदारांच्या निलंबनाचा मुद्दा, शक्ती कायदा करण्याच्या महाविकास आघाडीच्या घोषणेचा मुद्दा यावरुन सत्ताधाऱ्यांना प्रश्न विचारणार असल्याचे स्पष्ट केले होते. याचबरोबर ओबीसी आरक्षण, भरती घोटाळा हे ज्वलंत विषय देखील आहेत.