मुंबई - माहीम परिसरातल्या माहीम चौपाटी लगतच्या अतिक्रमणांवर तात्काळ कारवाई करण्याबाबत मुंबई शहर जिल्ह्याचे निवासी उप जिल्हाधिकारी यांच्या सूचनेनंतर महानगरपालिकेने आज कारवाई केली.

उपाआयुक्त रमाकांत बिरादार यांच्या मार्गदर्शनात आणि जी उत्तर विभागाचे सहाय्यक आयुक्त प्रशांत सपकाळे यांच्या नेतृत्वात करण्यात आलेल्या धडक कारवाई दरम्यान संबंधित परिसरातील सुमारे ५० झोपड्या हटविण्यात आल्या.

येथील अतिक्रमण हे धार्मिक स्वरूपाचे असल्याने कायदा व सुव्यवस्थेचा प्रश्न उद्भवू नये, याकरिता पोलीस खात्यामार्फत माहीम क्षेत्रात कडक बंदोबस्त तैनात करण्यात आला होता. तसेच सदर कार्यवाही दरम्यान निवासी उपजिल्हाधिकारी, मुंबई शहर यांची पथके तैनात होती. अतिक्रमणाची सदर कारवाई मुंबई शहर जिल्ह्याचे निवासी उपजिल्हाधिकारी यांच्या निदर्शनाखाली पार पाडण्यात आली. मात्र कारवाई दरम्यान अनुचित प्रकार घडला नसल्याची माहिती पालिकेने दिली. या कारवाईत सुमारे 50 झोपड्या हटविण्यात आल्या.