मुंबई : इंग्रजी विषयाची भीती दूर करून देशातील प्रत्येक राज्यातील मातृभाषेतून विद्यार्थ्यांना अभियांत्रिकीचे शिक्षण देण्यासाठी अखिल भारतीय तंत्र शिक्षण परिषदेने यंदापासून सुरू केलेल्या मातृभाषेतून अभियांत्रिकी शिक्षणाला देशात मराठी भाषेतून सर्वाधिक प्रतिसाद मिळाला आहे. सर्वात जास्त प्रवेश हे मराठीतून झाले असल्याची माहिती परिषदेने जाहीर केली आहे.

इंग्रजी भाषेची भीती दूर करण्यासाठी मागील वर्षी अखिल भारतीय तंत्र शिक्षण परिषदेने यासाठी धोरण आणले होते. त्या धोरणानुसार शैक्षणिक वर्ष २०२०-२१पासून आठ भारतीय भाषांमध्ये अभियांत्रिकीचे शिक्षण देण्याचा निर्णय घेतला. यामध्ये मराठी, हिंदी, बंगाली, तेलगु, तामिळ, गुजराती, कानडी आणि मल्यालळ या भाषांचा समावेश होता. यासाठी देशातील १९ महाविद्यालयांनी मातृभाषेतून शिक्षण देण्याची तयारी दर्शविली होती. यानुसार शैक्षणिक वर्ष २०२१-२२मध्ये देशभरातील १ हजार २३० जागांपैकी २५५ जागा भरल्या आहेत.

देशातील मातृभाषांमध्ये सर्वाधिक मराठी भाषेच्या ६० जागांवर विद्यार्थ्यांनी प्रवेश घेतले आहेत. त्याखालोखाल तामिळमध्ये ५० बंगालीमध्ये १६ तर तेलगु भाषेत १३ विद्यार्थ्यांनी प्रवेश घेतला आहे. कानडी भाषेत एकाही विद्यार्थ्याचा प्रवेश होऊ शकला नाही. या राज्यातील विद्यार्थ्यांनी इंग्रजीतून अभियांत्रिकीचे शिक्षण घेण्यासाठी आपली पसंती दाखवली असल्याची माहिती समोर आली आहे.