भिवंडी : जन्मदात्या आईचे परपुरुषाशी अनैतिक संबंध असल्याच्या रागातून तिच्या दोन मुलांनी कट रचून 50 वर्षीय व्यक्तीची निर्घृण हत्या केल्याची खळबळजनक घटना शनिवारी (ता. 24) भिवंडीतील संगमपाडा येथे घडली. पोलिसांनी या प्रकरणी गुन्हा दाखल करून फरारी आरोपींचा शोध सुरू केला आहे. 

अब्दुल हफिज अन्सारी मृत व्यक्तीचे नाव आहे. सरफराज शेख व सैफ शेख अशी आरोपींची नावे आहेत. भिवंडी शहरात संगमपाडा-पांजरापोळ येथील चाळीत अब्दुल अन्सारी राहत होता. एका शिधावाटपाच्या दुकानात तो काम करत होता. दोन वर्षांपासून त्याचे शेजारी राहणाऱ्या महिलेशी अनैतिक संबंध होते. हे कळल्यावर तिच्या मुलांनी याला विरोध करण्याचा प्रयत्न केला होता. तरीही हा प्रकार थांबला नव्हता. याचा राग मनात धरून सरफराज व सैफ यांनी अब्दुल दुकानातून घरी जात असताना त्याच्यावर चाकूने हल्ला केला. यात अब्दुल जखमी झाले होते. स्थानिकांनी उपचारासाठी रुग्णालयात दाखल केले होते. दरम्यान, मुंबईतील रुग्णालयात नेत असताना वाटेत त्यांचा मृत्यू झाला. या प्रकरणी निजामपुरा पोलिसांत गुन्हा दाखल केला असून, पुढील तपास पोलिस निरीक्षक संतोष घाटेकर करत आहेत.