विक्रोळी - व्यवसायाने नर्तक असलेल्या एका युवकाने राहत्या घरी गळफास घेऊन आत्महत्या केली. कन्नमवार नगरातील इमारत क्रमांक 88 येथे गुरुवारी सायंकाळी ही घटना घडली. संजोत घाग (वय 27) याने घरात कोणी नसताना स्वत:चे जीवन संपविले. 

रात्री 8 च्या सुमारास त्याची आई घरी आली तेव्हा दरवाजा आतून बंद होता. घरात असलेला संजोत दरवाजा का उघडत नाही, यासाठी खिडकीतून पाहिले असता संजोत गळफास लावलेल्या अवस्थेत आढळला. यानंतर तातडीने शेजारी आणि त्याच्या मित्रांना बोलावण्यात आले. दरवाजा तोडून पालिकेच्या महात्मा फुले रुग्णालयात संजोतला नेण्यात आले. त्याआधीच तो मरण पावला होता. ही बातमी पसरताच रुग्णालयाजवळ संजोतच्या आप्तस्वकीयांनी गर्दी केली होती. 

संजोत हा एक चांगला नर्तक होता. त्याची स्वतःची सिल्व्हर स्टेपर्स नावाची नृत्य अकादमी होती. विक्रोळी परिसरात नर्तक म्हणून तो प्रसिद्ध होता. दूरचित्रवाहिनीवरील इंडियाज गॉट टॅलेंट या डान्स शोमध्ये संजोतच्या मार्गदर्शनाखाली त्याच्या ग्रुपने सहभाग घेतला होता. मनमिळाऊ असलेल्या संजोतने टोकाचे पाऊल का उचलले हेच समजले नाही, असे त्याचा मित्र तन्मय कांबळे याने सांगितले. आत्महत्येचे कारण अजून स्पष्ट झालेले नाही, तपास सुरू आहे असे विक्रोळी पोलिस ठाण्याचे वरिष्ठ पोलिस निरीक्षक संजय मोरे यांनी सांगितले.

'ई सकाळ'वरील इतर महत्त्वाच्या बातम्या

15 डिसेंबरपासून होणार संसदेचे हिवाळी अधिवेशन
पुढील वर्षी भूकंपाचे जोरदार धक्के बसणार?
माजलगांवात उस आंदोलन पेटले
पित्याच्या किडनीदानातून मुलाला जीवनदान  
सोलापूर महापालिकेची आर्थिक स्थिती कोलमडली
मुख्यमंत्रीसाहेब, रोज या..
'कुलभूषण जाधव कुटुंबीयांच्या सुरक्षेची हमी द्यावी'