अलिबाग : अनेक प्रकरणांमुळे वादग्रस्त ठरलेले अलिबाग मतदारसंघातील शिवसेनेचे उमेदवार महेंद्र दळवी यांच्याविरोधात गंभीर गुन्ह्यांची नोंद आहे. विशेष म्हणजे जिल्ह्यातील सातही मतदारसंघातील ७८ उमेदवारांत ते याबाबत आघाडीवर आहेत. 

घरगुती हिंसाचार, चोरी, मारामारी, जमीन हडप करणे या संदर्भात अलिबाग पोलिस ठाण्यात २०१० पासून दळवींविरोधात गुन्हे दाखल आहेत. दळवी यांच्या पत्नी मानसी दळवी यांच्या नावावर मौजे तुडाळ सर्व्हे क्रमांक  १६/२ मध्ये खाणपट्टा आहे. खनिकर्म अधिकारी रायगड यांनी १५ कोटी ३५ लाख ११ हजार ३२५ रुपयांचा दंड ठोठावला आहे. हे प्रकरण न्यायप्रविष्ट आहे. यातील दंडात्मक रक्कम २८ लाख १९ हजार २५१ रुपये २६ सप्टेंबरला शासकीय चलनाने भरली आहे. जिल्ह्यातून विधानसभा निवडणूक लढविणाऱ्या ७८ उमेदवारांमध्ये सर्वाधिक गुन्हेगारी पार्श्‍वभूमी दळवी यांची आहे. गुन्ह्यांबाबतची माहिती त्यांनी निवडणूक प्रतिज्ञापत्रात दिली आहे.

ही आहेत कलमे
घरगुती हिंसाचार कायदा कलम १२, १८, १९, १९, २, २०
भारतीय दंड संहितेचे कलम ३७९, जमीन महसूल कायदा १६७, १८२
भारतीय दंड संहितेचे कलम ३२४, १४३, १४७, १४८, ४२७, ३२३, ५०४, ५०६, मु. पो. ॲक्‍ट ३७१, ३, १३५ ॲट्रॉसिटी ॲक्‍ट ३१, १०, ६