Mumbai News : उपनगरीय रेल्वेच्या देखभाल-दुरुस्तीकरिता मध्य रेल्वेवर मेगाब्लॉक घेतल्याने मकर संक्रांतीच्या सणानिमित्त खरेदीसाठी घराबाहेर पडलेल्या नागरिकांचे रविवारी प्रचंड हाल झाले आहे.

मध्य रेल्वेच्या माटुंगा ते मुलुंड स्थानकांदरम्यान अप आणि डाउन जलद मार्गावर आणि पनवेल ते वाशी दरम्यान अप आणि डाउन दोन्ही हार्बर मार्गावर ब्लॉक असल्याने मुंबईकरांना लोकल गर्दीचा सामना करावा लागला आहे.

मध्य रेल्वेच्या माटुंगा ते मुलुंड स्थानकांदरम्यान अप आणि डाउन जलद मार्गावर सकाळी ११ ते दुपारी ४ वाजेपर्यत दुरुस्ती करण्यात आली.त्यामुळे जलद मार्गावरील वाहतूक धिम्या मार्गावरुन वळविण्यात आली होती.

यामुळे धिम्या मार्गावरील लोकलचे वेळापत्रक देखील कोलमडले होते. त्यातच रविवार असल्याने लोकलची संख्या कमी होती.यामुळे प्रवाशांना लोकल गर्दीतून प्रवास करावा लागला. तसेच दादर, कुर्ला, घाटकोपर ठाणे, कल्याण रेल्वे स्थानकांवर प्रवाशांची अतिरिक्त गर्दी दिसून आली आहे.

हार्बर मार्गावर पनवेल ते वाशी दरम्यान अप आणि डाउन दोन्ही मार्गावर सकाळी ११ते दुपारी ४ वाजेपर्यत ब्लॉक होता. या दरम्यान पनवेल ते वाशी दरम्यानची सर्व लोकल वाहतूक बंद होती. तसेच ट्रान्स हार्बर मार्गावर नेरुळ ते पनवेल दरम्यानच्या लोकल देखील बंद होत्या. त्यामुळे वाशी ते पनवेल दरम्यानच्या प्रवाशांना रस्ते मार्गाने प्रवास करावा लागला.

मेल-एक्सप्रेस गाड्या फटका

गेल्या काही दिवसांपासून दाट धुक्यामुळे अनेक मेल- एक्सप्रेस गाडयांना फटका बसतो आहे. त्यामुळे मेल-एक्सप्रेस गाड्या आपल्या निर्धारित वेळेपेक्षा उशिराने धावत असल्याने त्यांच्या परिणाम थेट उपनगरीय लोकल सेवनावर होताना दिसून येत आहे.

रविवारी पहाटे दाट धुक्यामुळे लांब पल्याच्या मेल -एक्सप्रेस गाड्या आपल्या निर्धारित वेळापेक्षाही विलंबाने धावत होत्या.या गाड्या उपनगरीय लोकल मार्गावर वळविण्यात आल्याने अँप जलद मार्गावरील लोकलवर परिणाम दिसून आला आहे.