मुंबई - हार्बर मार्गावरील पनवेल स्थानकावर समर्पित फ्रेट कॉरिडॉरसाठी दोन ट्रॅक टाकण्यासाठी दररोज मध्यरात्री चार तासांचा ब्लॉक घेण्याचा निर्णय घेतला आहे. हा ब्लॉक अंदाजे ४५ दिवस चालणार आहे. त्यामुळे हार्बर मार्गावर उशिरा सुटणाऱ्या काही लोकल सेवा वाशी स्थानकांपर्यत चालविण्यात येणार आहे.

ग्रेटर नोएडातील दादरीपासून ते मुंबईतील जवाहरलाल नेहरू बंदरापर्यंत (जेएनपीटी) मालवाहतुकीसाठी सर्वत्र रेल्वे मार्गिका टाकण्याचा प्रकल्प डेडिकेटेड फ्रेट कॉरिडॉर कॉर्पोरेशन लिमिटेडने हाती घेतला आहे. याच प्रकल्पाचा एक भाग म्हणून दोन नवीन ट्र्क पनवेल स्टेशन यार्डमधून जाण्याचे नियोजित आहे.

त्याचाच एक भाग म्हणून पनवेल ईएमयू उपनगरीय स्टॅबलिंग लाईन्समध्ये बदल करण्यात येणार आहे. त्यामुळे या कामासाठी दररोज चार तासांचा रात्रकालीन ब्लॉक घेण्यात येत आहे. या ब्लॉक कालावधीत, सीएसएमटीहून रात्री १२. २८ आणि १२.४० वाजताची सुटणारी शेवटची पनवेल लोकल वाशी येथे शॉर्ट टर्मिनेट करण्यात येईल.

त्यामुळे सानपाडा, जुईनगर, नेरुळ, सीवूड दारावे, बेलापूर, खारघर, मानसरोवर, खांदेश्वर आणि पनवेल स्थानकांदरम्यानची सेवा उपलब्ध होणार नाही. याशिवाय, पहाटे ४.०३ वाजता सुटणारी पनवेल-सीएसएमटी अप मार्गावरील लोकल पनवेल ऐवजी वाशी स्थानकातून पहाटे ०४.३३ वाजता निघेल आणि दुसरी पहाटे ४.२७ ची पनवेल-सीएसएमटी लोकल पनवेलऐवजी वाशी स्थानकातून पहाटे ४. ५७ वाजता सुटणार आहे.

याशिवाय, सीएसएमटीहून पनवेलसाठी मध्यरात्री १२.१३ ची सुटणारी शेवटची लोकल आता पनवेलला रात्री १. ३३ वाजता पोहोचेल. पनवेल ते सीएसएमटी पहिली लोकल पहाटे ४. ४९ वाजता सुटून सीएसएमटी येथे सकाळी ६.०८ वाजता पोहोचेल.