मुंबई - शिवसेना (उबाठा) नेते तसेच माजी नगरसेवक अभिषेक घोसाळकर यांच्या हत्येप्रकरणी आरोपी मॉरीस नोरोन्हा याचा जवळचा सहकारी मेहुल पारिख याला अटक होण्याची दाट शक्यता आहे. या प्रकरणाच्या चौकशीदरम्यान मेहुलच्या जबाबातील विसंगती तसेच सीसीटिव्ही फुटेज बघता, या संपुर्ण कटाची माहिती मेहुलला होती. या निष्कर्षाप्रती पोलिस आले आहेत.

गेल्या आठवड्यात दहिसरमध्ये अभिषेक घोसाळकर यांची गोळ्या झाडून हत्या करण्यात आली. आरोपी मॉरीसचा मित्र असलेल्या मेहुल पारीख याला अभिषेक घोसाळकर यांच्या हत्येचा कटाची माहिती होती. मात्र तरीही त्यापासून परावृत्त करण्यासाठी त्याने काहीच केले नाही. असा गुन्हे शाखेच्या अधिकार्‍यांचा प्राथमिक अंदाज आहे. त्यामुळे अधिक चौकशीसाठी मेहुलला कोणत्याही क्षणी अटक होईल असे पोलीस सूत्रांनी सांगितले.

या प्रकरणी मॉरीसचा अंगरक्षक अमेंद्रर अशोककुमार मिश्रा हा सध्या न्यायालयीन कोठडीत आहे. या प्रकरणातच मॉरीसचा जवळचा सहकारी मेहुल पारीख याचाही जबाब पोलिसांनी नोंदवला होता. या घटनेच्या वेळेस उपस्थित नव्हता. काही मिनिटापुर्वी त्याच्या आजारी आईला बघायला गेल्याचा दावा मेहुलने केला. मात्र सीसीटिव्ही फुटेजवरुन घटनेच्या वेळी मेहुल तिथे उपस्थित असल्याचे स्पष्ट झाले. असे पोलिसांनी सांगीतले.

मॉरीसला पाठींबा

हत्येच्या दिवशी मॉरीसची वागणुक संशयास्पद होती.मॉरीस काही तरी करणार आहे याची माहिती मेहुलला होती. अप्रत्यक्ष मॉरीसच्या कृत्याला मेहुलचा पाठींबा होता असा संशय पोलिसांना आहे. गोळीबारानंतर मेहुलने घटनास्थळावरुन पळ काढला, त्यामुळे पोलिसांचा संशय अधिकच बळावला आहे.

मेहुल संशयाच्या घेऱ्यात

१. हत्येच्या दिवशी मॉरीसची वागणूक संशयास्पद होती.मात्र मेहुलने त्याला रोखले का नाही?

२. गोळीबारानंतर घटनास्थळावरुन पळून जाण्याचे कारण काय होते

३. गोळीबाराच्या वेळी उपस्थित नसल्याचा मेहुलचा दावा खोटा

४. मॉरीसच्या कृत्याला मेहुलचा पाठींबा होता का?