मुंबई: उद्योगपती मुकेश अंबानी यांची स्फोटकांनी भरलेली कार सापडली होती. या प्रकरणातील मुख्य आरोपी असलेल्या सचिन वाझेला NIAने तपासादरम्यान अटक केली. त्यानंतर राज्य सरकारने सचिन वाझेवर निलंबनाची कारवाई केली. निलंबन होताना सचिन वाझे CIU म्हणजेच क्राईम इंटेलिजन्स युनीट चा प्रमुख होता. त्यामुळे त्याच्या जागी कोणाची नियुक्ती होणार? याकडे साऱ्यांचेच लक्ष लागले होते. अशा परिस्थितीत राज्य सरकारने केलेल्या बदल्यांमध्ये सचिन वाझेच्या जागी मिलिंद काठे यांना CIUच्या प्रमुखपदी नियुक्त करण्यात आले. मिलिंद मधुकर काठे हे गुन्हे शाखेच्या कक्ष २ चे निरिक्षक होते. त्यांची सध्या प्रभारी म्हणून नियुक्ती करण्यात आली. मुकेश अंबानी धमकी प्रकरणानंतर गुन्हे शाखेतील ६५ जणांच्या बदलीनंतर मंगळवारी गुन्हे शाखेला आणखी २४ नवीन अधिकारी मिळाले. त्यातच काठे यांचीही नियुक्ती झाली.

नवीन पोलीस आयुक्त हेमंत नगराळे यांनी वाझे प्रकरणानंतर गुन्हे शाखेत अनेक वर्षे कार्यरत असणाऱ्या काही अधिकाऱ्यांची तडकाफडकी बदली केली. त्यानंतर गुन्हे शाखेचे प्रमुख सह आयुक्त मिलिंद भारंबे यांनी मंगळवारी याबाबत आदेश काढून गुन्हे शाखेत नव्याने हजर झालेल्या २४ पोलीस निरीक्षकांच्या नियुक्त्या जाहीर केल्या. तसेच वाझे यांच्यानंतर रिक्त झालेल्या जागी पोलीस निरीक्षक मिलिंद मधुकर काठे यांच्याकडे CIUची जबाबदारी दिली. याशिवाय, कक्ष तीनमध्ये कार्यरत असलेले पोलीस निरीक्षक योगेश चव्हाण यांच्याकडे खंडणी विरोधी पथकाची जबाबदारी सोपविण्यात आली आहे. (Milind Kathe Crime Branch appointed CIU Chief replacing Sachin Waze)

"समझने वाले को..."; भाजप नेत्याचं सूचक ट्वीट

दरम्यान, सचिन वाझे प्रकरणात NIAने काठे यांचीही चौकशी केली आणि त्यांचा जबाब नोंदवला. अँटिलिया स्फोटक प्रकरणाचा तपास ज्या पथकाने केला त्यात काठे यांचाही समावेश होता. त्यामुळे तपास अधिकारी म्हणून त्यांचाही जबाब नोंदविण्यात आला.