मुंबई : आमदार गीता जैन यांनी एका अभियंत्याला कानशिलात लगावल्याचा व्हिडीओ समोर आल्यानंर त्या चांगल्या चर्चेत आल्या होत्या. त्यानंतर आता त्यांचा आणखी एक व्हिडीओ समोर आला आहे. तांत्रिक बिघाडामुळे नाटकाला उशिर झाल्यामुळे गीता जैन या थिएटरच्या बुकिंग कर्मचाऱ्यावर संतापल्या आहेत.

अधिक माहितीनुसार, मीरा भाईंदर महापालिका नाट्यगृहातील हा व्हिडिओ असून पाच वाजता असणारा प्रयोग आधीचा प्रयोग संपवायला वेळ लागला त्यामुळे पुढे ढकलण्यात आला होता. तर साडेसहा वाजले तरी नाटकाचा प्रयोग सुरू न झाल्यामुळे संतापलेल्या आमदार जैन यांनी बुकिंग कर्मचाऱ्याला चांगलंच धारेवर धरलं.

"ज्यांना तुम्ही पाचचा वेळ दिला त्यांना साडेसहापर्यंत थिएटर देत नाहीत. मला कुणाशीही काहीच बोलायचं नाही, तुम्ही मला लिहून द्या की सहा वाजता हॉल दिला आहे. नाट्यगृह चालवाच्या नावाखाली असे धंदे करता का?" अशा शब्दांत त्यांनी बुकिंग अधिकाऱ्याला झापलं आहे. या प्रकरणानंतर दिग्दर्शक राजेश देशपांडे यांनी संताप व्यक्त केला असून आमदार जैन यांचा निषेध केला आहे.

"आता पुढे हे असच होणार का? आमदारांचा पुन्हा मराठी द्वेष? वर्षानंतर पाहिले मराठी नाटक लागले त्यात आमदारांनी घातला गोंधळ... हिंदी नाटक उशीरा सुरू झाले म्हणून आमदारांनी मराठी नाटक इतक्या उशीरा का संपवले म्हणून अधिकाऱ्यांना झापले..

हे मराठी राज्य आहे इथल्या नाट्यगृहात हक्क मराठीचाच, हिंदी नाटकासाठी भांडणाऱ्या आमदार वर्षभर तांत्रिक अडचण होती मराठी नाटक लागत नव्हते त्यावेळी कुठे होत्या? त्यावेळी असा पारा का चढवला नाही?

मराठी राज्यात आमदार आहात हे दरवेळी का विसरता??

आता २०२४ ला घरी बसवविण्याची वेळ आली आहे. आमदारांचा जाहीर निषेध"

अशा आशयाची फेसबुक पोस्ट करत त्यांनी निषेध व्यक्त केला आहे.