मुंबई: महाराष्ट्र नवनिर्माण सेनेचे सरचिटणीस आणि प्रवक्ते संदीप देशपांडे (sandeep deshpande) यांनी विद्युत रोषणाई प्रकल्पावरुन शिवसेनेवर (shivsena) अत्यंत बोचरी टीका केली आहे. त्यांनी शिवसेनेला उचलेकरांचा पक्ष म्हटलं आहे. शिवसेनेने मागे पालिकेतील आपली सत्ता बळकट करण्यासाठी मनसेचे (MNS) मुंबई महापालिकेतील (BMC) सहा नगरसेवक फोडले होते तसेच शिवाजी पार्क भागात मनसेच्या संकल्पनांची शिवसेना कॉपी करत असल्याचा संदीप देशपांडे यांचा आरोप आहे. याच मुद्यावरुन त्यांनी शिवसेनेवर टीका केली आहे. चोरी करायची तर स्वखर्चाने तरी करा ती पण जनतेच्या पैशांनी? असा सवाल त्यांनी विचारला आहे.

मुंबई लोकल सर्वसामान्यांसाठी खुली व्हावी, यासाठी सुद्धा संदीप देशपांडे सातत्याने आवाज उठवत होते. त्यांनी मुख्यमंत्री उद्धव ठाकरेंवर अत्यंत बोचऱ्या शब्दात टीका केली होती. कालही त्यांनी लोकल खुली करण्याच्या निर्णयाबद्दल मुख्यमंत्र्यांचे अभिनंदन करताना उपरोधिक टीकाही केली होती.

"आंदोलन,याचिका, पत्र, विनंती, त्रागा, धमकी, बातमी लावून धरण आणि इतर अनेक उपाय या माध्यमातून लोकल 15 ऑगस्ट ला चालू करण्याची आपण घोषणा केली. असो आपलं अभिनंदन आता आपण मंत्रालयात बसून लोकांचे प्रश्न येत्या 15 ऑगस्ट पासून सोडवाल या साठी याचिका करू का आंदोलन हे ही सांगा" असं त्यांनी आपल्या टि्वटमध्ये म्हटलं होतं.