डोंबिवली : मनोज जरांगे यांची तब्येत बिघडली असून आता जरांगे यांच्या ढासळलेल्या तब्येतीवरून मनसे मतदार राजू पाटील यांनी सरकारच्या भूमिकेवर टिका केली आहे. "सरकारने फोडाफोडीच्या राजकारणातून थोडी उसंत घेऊन सर्वप्रथम जरांगेच्या तब्येतीची दखल घेणे गरजेचे आहे. सरकारने कोणाच्या जीवाशी खेळू नये" असे ट्विट आमदार पाटील यांनी केले आहे.

मराठा समाजाच्या आरक्षणाबाबत शासनाने कुणबी प्रमाणत्र देताना सगेसोयऱ्यांचाही समावेश करावा, तसा कायदा मंजूर करावा, मराठा आरक्षणासाठी विधिमंडळाचे अधिवेशन त्वरित घ्यावे, आरक्षण अधिसूचना व मसुद्याची अंमलबजावणी करावी आदी मागण्यांसाठी मनोज जरांगे पाटील हे 10 फेब्रुवारीपासून अंतरवाली सराटी येथे उपोषणाला बसले आहेत. त्यांच्या उपोषणाचा आज पाचवा दिवस आहे.

अन्न, पाणी व वैद्यकीय उपचारांना त्यांनी नकार दिला आहे. अशक्तपणामुळे त्यांना उठता-बसता येत नाही. तरीही ते उपोषणावर ठाम आहेत. त्यांची तब्येत खूपच ढासळली असल्याचे वृत्त बुधवारी आले आहे. यावर मनसेचे आमदार राजू पाटील यांनी सरकारच्या भूमिकेवर ट्विटरच्या माध्यमातून टिका केली आहे.

मनसे आमदार राजू पाटील यांचे ट्विट

"मनोज जरांगेंची तब्येत ढासळत चालली आहे, अशावेळी सरकारने फोडाफोडीच्या राजकारणातून थोडी उसंत घेऊन सर्वप्रथम जरांगेच्या तब्येतीची दखल घेणे गरजेचे आहे. कोण चुक व कोण बरोबर हे येणारा काळ ठरवेल परंतु सरकारने कोणाच्याही जीवाशी खेळू नये. @mieknathshinde @Dev_Fadnavis @AjitPawarSpeaks