मुंबई: निव्वळ प्रवासी वाहतुकीच्या भरवशावर पोटाची खळगी भरणाऱ्या रिक्षा चालकांचा व्यवसाय गेल्या एक वर्षापासून ठप्प पडला आहे. दोनच प्रवाशांच्या वाहतुकीला परवानगी असल्याने, दिवसभरातील उदरनिर्वाहाची सोय करणे सुद्धा कठीण झाले आहे. अशा द्विधा मनस्थितीत असलेल्या रिक्षा चालकांना (auto rikshaw unioun) आता १५०० रुपयांचे अर्थसहाय्य मिळविण्यासाठी सुद्धा धडपडावे लागत आहे. मात्र, मुंबई आणि उपनगरांमध्ये मनसेच्या वाहतुक शाखा रिक्षा चालकांच्या मदतीला धावून आली असून, रिक्षा चालकांची ऑनलाईन नोंदणी केली जात आहे. (Mns transport wing helps auto rikshaw unioun)

परवानाधारक रिक्षाचालकांना एकवेळचे अर्थसहाय्य देण्याची राज्य शासनाने घोषणा केली होती. त्यानंतर आता परिवहन विभागाने ऑनलाईन कार्यप्रणाली विकसित केली आहे. 24 मे पासून ऑनलाईन पद्धतीने रिक्षा चालकांना आपली नोंदणी करायची आहे. चालकांना वाहन क्रमांक, अनुज्ञप्ती क्रमांक व आधार क्रमांक नोंद करावा लागतो, मात्र, सोप्या पद्धतीची प्रक्रिया असली तरी, रिक्षा चालकांना मात्र, ऑनलाईन पद्धत हाताळण्याची सवय नसल्याने त्यांना त्रास सहन करावा लागत आहे.

त्यातच सायबर कॅफे सध्या लॉकडाऊनमुळे बंद असल्याने, मोठी अडचण निर्माण झाली असतांना, महाराष्ट्र नवनिर्माण वाहतुक सेनेच्या शाखा रिक्षा चालकांसाठी खुल्या करण्यात आल्या आहेत. यामध्ये निशुल्क पद्धतीने रिक्षा चालकांची नोंदणी केली जात आहे. त्यामूळे रिक्षा चालकांना दिसाला मिळाला आहे.

लॉकडाऊन असल्याने सायबर कॅफे बंद आहे. शिवाय रिक्षा चालक फार काही शिक्षीत नसल्याने, त्यांना ऑनलाईन रजिस्ट्रेशन करणे शक्य होत नाही. त्यामूळे मुंबई उपनगरातील सर्व मनसेच्या वाहतुक शाखेच्या कार्यालयांमधून 1500 रूपयांचे अर्थसहाय्य मिळविण्यासाठी रिक्षा चालकांचे निशुल्क नोंदणी अभियान सुरू केले आहे. त्यासोबतच राज्यभरातील मनसे वाहतुक शाखांनी रिक्षा चालक बांधवांना मदत करावे.

- संजय नाईक, अध्यक्ष, महाराष्ट्र नवनिर्माण वाहतुक सेना