मुंबई - रेल्वेस्थानकात गर्दीच्या वेळी गंभीर घटना घडल्याचे सांगत कुटुंबीयांशी संपर्क साधण्यासाठी अन्य प्रवाशांकडून घेतलेला मोबाईल चोरून पसार होणाऱ्या दुकलीला वांद्रे रेल्वे पोलिसांनी जेरबंद केले.

तक्रारदाराने एका आरोपीचे वर्णन "शेंडीवाला' असे केले होते. हाच धागा पकडून पोलिसांनी तपास करीत देवाशिष गोविंद पेंढारी आणि पंडिराज मायांडी नाडर यांना अटक केली. न्यायालयाने त्यांना पोलिस कोठडीत ठेवण्याचा आदेश दिला आहे.

पेंढारी आणि नाडर यांनी 10 दिवसांपूर्वी वांद्रे स्थानकातून एका प्रवाशाचा मोबाईल पळवला होता. तक्रारदाराने एका आरोपीचे वर्णन "शेंडीवाला' असे केले होते. सीसीटीव्ही चित्रणात पोलिसांना एक शेंडीधारी दिसला. त्यानंतर पोलिसांनी चार दिवस सापळा रचून शेंडीधारी पेंढारीसह नाडर यालाही अटक केली.