मुंबई - आम आदमी पक्षाने देशभर "मोदी हटाव देश बचाव" ही मोहिम आजपासून सुरू केली असून आज या मोहिमेचे पोस्टर लावत असताना पोलिसांनी विरोध केला. त्यावरून कार्यकर्ते आणि पोलिसांमध्ये बाचाबाची झाली.

मुंबईसह राज्यभरात ही मोहिम राबविण्यात येत असून नागरिकांमध्ये या मोहिमेची जागृती व्हावी हा या मोहिमेचा उद्देश असल्याची माहिती आपच्या नेत्या प्रीती शर्मा मेनन यांनी पत्रकार परिषदेत दिली. पोस्टर लावण्याची मोहिम सार्वजनिक ठिकाणी लावण्यात येत आहे. मात्र मुंबईत पोलिसांनी पोस्टर लावण्यास विरोध केला आहे. पोलिसांनी विरोध केला तरी ही मोहिम राज्यभर राबविली जाईल असेही त्या म्हणाल्या.

ब्रिटिश काळातील कायदे जनतेवर पुन्हा एकदा लादून मोदी सरकार देशातील जनतेचा आवाज चिरडण्याचा प्रयत्न करत आहे, जर आता आपण या जुलूमशाहीच्या विरोधात उभे नाही राहिलो, तर येणाऱ्या पिढ्या आपल्याला माफ करणार नाहीत, असेही प्रीती शर्मा मेनन यावेळी म्हणाल्या. यावेळी आम आदमी पार्टी महाराष्ट्रचे उपाध्यक्ष धनराज वंजारी, मुंबईचे कार्याध्यक्ष रूबेन मस्करेन्हस व द्विजेंद्र तिवारी, महाराष्ट्र सचिव धनंजय शिंदे, मुंबई उपाध्यक्ष पायस व्हर्गीस आदी यावेळी उपस्थित होते.