मोखाडा : मोखाडा ग्रामीण रूग्णालयातील (Mokhada hospital) सोनोग्राफी मशीन (sonography machine) गेल्या चार महिन्यांपासून ऑपरेटर विना बंद आहे. त्यामुळे तालुक्यातील हजारो गरोदर आणि स्तनदा मातांच्या (pregnant woman health) आरोग्याचा प्रश्न (health problems) ऐरणीवर आला आहे. अखेर संतप्त झालेल्या आदिवासी महिलांनी (tribal women's) रूग्ण सेवा समितीच्या सदस्या व आरोहण संस्थेच्या प्रकल्प अधिकारी माधुरी मुकणे (madhuri mukane) यांच्या नेतृत्वाखाली मोखाडा ग्रामीण रूग्णालयाला धडक देत प्रशासनाला जाब विचारला आहे.  

मोखाडा तालुक्यातील कुपोषणाला आळा घालण्यासाठी व गरोदर मातांची काळजी घेण्यासाठी आरोहण सामाजिक संस्थेने, सिमेंन्स कंपनीच्या माध्यमातून ऑगस्ट  2018  मध्ये मोखाडा ग्रामीण रूग्णालयाला सोनोग्राफी मशीन ऊपलब्ध करून दिले आहे. त्यामुळे तालुक्यातील गरोदर मातांची वेळेवर तपासणी होऊन काही अंशी कुपोषणाला आळा बसला आहे. मात्र, जुलै महिन्यांपासून सोनोग्राफी मशीन बंद असल्याचे कारण देत रूग्णालय प्रशासन, तपासणीसाठी येणाऱ्या गरोदर मातांना माघारी पाठवत आहे. त्यामुळे पदरमोड करून त्यांना खाजगी दवाखान्यात अथवा जव्हारला जाऊन सोनोग्राफी करून घ्यावी लागते आहे. 

गरोदर मातांनी ही बाब आरोहण संस्थेच्या मोखाडा तालुका प्रकल्प अधिकारी व रूग्ण सेवा समिती सदस्या माधुरी मुकणे यांच्या निदर्शनास आणून दिली. अखेर, मुकणे यांनी गरोदर मातांना घेऊन, मोखाडा ग्रामीण रूग्णालयाला धडक दिली आणि सोनोग्राफी मशीन बंद असल्याचा जाब विचारला. त्यावेळी सोनोग्राफी मशीन हातळणारा ऑपरेटर नसल्याने मशीन बंद ठेवण्यात आले आहे. तसेच ऑपरेटर ला मानधन देण्यासाठी निधीच ऊपलब्ध नसल्याचे, धक्कादायक वास्तव सांगण्यात आल्याने, गरोदर माता संतप्त झाल्या आहेत. या घटने विषयी मोखाडा ग्रामीण रूग्णालयाचे वैद्यकीय अधिक्षक डाॅ महेश पाटील यांच्याशी संपर्क साधण्याचा प्रयत्न केला असता, होऊ शकला नाही. 

"मोखाडा ग्रामीण रूग्णालयाचे वैद्यकीय अधिक्षक डाॅ महेश पाटील यांनी  11  नोव्हेंबर पासुन सोनोग्राफी मशीन सुरू करून कॅम्प घेतला जाईल असे सांगितले आहे. गरोदर मातांची सोनोग्राफी मशीन द्वारे तपासणी सुरू न झाल्यास गरोदर मातांना घेऊन आंदोलनाचा मार्ग अवलंबवा लागेल."

- माधुरी मुकणे, रूग्ण सेवा समिती सदस्य व प्रकल्प अधिकारी, आरोहण संस्था.