मुंबई- राज्याची राजधानी मुंबईमध्ये एक धक्कादायक घटना घडली आहे. एका शॉपिंग मॉलच्या टॉयलेटमध्ये एका ३५ वर्षीय महिलेला जीवे मारण्याचा प्रयत्न करण्यात आल्याचा आरोप आहे. याप्रकरणी एका आरोपीला अटक करण्यात आली आहे. पोलिसांनी यासंदर्भातील माहिती दिल्याचं एएनआय या वृत्तसंस्थेने सांगितलं आहे. (molesting and attempting to kill a 35 year old woman inside the toilet of a shopping centre in Mumbai)

मिळालेल्या माहितीनुसार, महिला वकील आहे. दक्षिण मुंबईतील लोकमान्य टिळक मार्गावरील अशोका शॉपिंग सेंटरजवळ तिचे ऑफिस आहे. सकाळी साडेसातच्या सुमारास महिला शॉपिंग सेंटरमधील कॉमन टॉयलेटमध्ये गेली होती. टॉयलेटमध्ये एक २१ वर्षीय व्यक्ती उपस्थित होता. महिलेने त्या व्यक्तीला बाहेर जाण्यास सांगितले. आरोपीने बाहेर गेल्यासारखं केलं, पण जेव्हा महिला टॉयलेटला गेली तेव्हा तो पुन्हा आतमध्ये आला.

जेव्हा महिला टॉयलेटमधून बाहेर आली तेव्हा आरोपी तिला बाहेर उभा असल्याचा दिसला. आरोपीने दरवाजा आतून लावून घेतला होता. आरोपीने महिलेचा विनयभंग केला, त्यानंतर तिचा जीव घेण्याचा देखील प्रयत्न केला. महिलेने आरडा-ओरडा सुरु केल्यानंतर त्याने महिलेच्या पोटात लाथ मारली आणि तो पसार झाला अशी माहिती पोलीस अधिकाऱ्यांनी दिली आहे.

आझाद मैदान पोलिसांना यासंदर्भातील माहिती देण्यात आली. आरोपीचे नाव रामशंकर गौतम उर्फ संदीप पांडे असल्याचं कळतंय. तो जवळच्याच एका ऑफिसमध्ये सेक्युरिटी गार्ड म्हणून काम करतो. आरोपी विरोधात हत्येचा प्रयत्न, विनयभंग, घातपाताचा कट अशा काही कलमाअंतर्गंत गुन्हा दाखल करण्यात आला आहे. त्याला २३ एप्रिलपर्यंत पोलीस कोठडी सुनावण्यात आली आहे. (Crime News)