पुणे : प्रसिद्ध बांधकाम व्यावसायिक अविनाश भोसले यांचा मुलगा अमित भोसले यांच्याविरुद्ध सक्त वसुली संचालनालयाने न्यायलायात दोषारोपपत्र दाखल केले आहे. मागील वर्षी पासून सुरू असलेल्या या चौकशीमध्ये "एआरए प्रॉपर्टीज" व अन्य दोन जमिनीच्या प्रकरणात हे सहा हजार पानी दोषारोपपत्र दाखल करण्यात आले आहे. अविनाश भोसले यांचे "एबी आयएल" हे मुख्यालय सरकारी अधिकारी यांच्यासाठी राखीव असलेल्या जागेवर आहे. ही जमीन ईडीने मागील वर्षी ऑगस्ट महिन्यात जप्त केली होती.

"ईडी"ने ऑगस्ट २०२१ मध्ये या प्रकरणाशी संबंधित 4 कोटी रुपयांची मालमत्ता जप्त केली होती. या जमिनीवर भोसले यांची "एबीआयएल" आणि इतर कंपन्यांची कॉर्पोरेट कार्यालये आहेत. 'ईडी"ने 2016 मध्ये भोसले यांच्याविरुद्ध मनी लाँड्रिंग प्रकरणी गुन्हा दाखल केला होता. त्यानुसार, संबंधित सरकारी जमीन ही केवळ सरकारला हस्तांतरीत करता येऊ शकते, असे असतानाही संबंधित जमीनएका व्यक्तीने "एआरए" कंपनीला हस्तांतरित करीत नियमांचे उल्लंघन केले.मनी लाँड्रिंगच्या तपासादरम्यान, विविध ठिकाणी शोध आणि जप्तीची कारवाई करण्यात आली. त्या कागद पत्रावरून "ईडी"ने अमित भोसले यांच्या विरुद्ध कारवाई केली आहे. त्यानुसार ,आता न्यायालयात दोषारोप पत्र दाखल करण्यात आले आहे.

अविनाश भोसले व व्यावसायिक सत्येन टंडन यांच्याविरुद्ध केंद्रीय अन्वेषण विभागाने (सीबीआय) न्यायालयात दोषारोपपत्र दाखल केले होते. हे दोषारोपपत्र येस बँक डीएचएफएलमध्ये (डिएचएफएल) तीन हजार ७०० कोटी रुपयांच्या घोटाळ्याप्रकरणी आहे. घोटाळ्याप्रकरणी सुरवातीला सीबीआयने त्यांना अटक केली होती त्यांनतर त्यांची ईडीने चौकशी केली. चौकशी दरम्यान त्यांना ईडीने अटकही केली. अविनाश भोसले हे सध्या न्यायालयीन कोठडीमध्ये आहेत. त्यानंतर आता भोसले यांचा मुलगा अमित भोसले याच्या विरुद्ध "ईडी"ने हि दोषारोपपत्र दाखल केले आहे.