नवी मुंबई : हार्बर आणि ट्रान्स हार्बर रेल्वेमार्गावर चोरांचा सुळसुळाट वाढला असून दोन दिवसांत जुईनगर आणि नेरूळ रेल्वेस्थानकाजवळ लोकलमधून प्रवास करणाऱ्या प्रवाशांचे महागडे मोबाईल फोन चोरून नेल्याचे उघडकीस आले आहे.
 
शुक्रवारी (ता. 5) रात्री पावणेअकरा वाजण्याच्या सुमारास आनंदराव माने नेरूळ रेल्वेस्थानकावरून लोकलने पनवेलला जायला निघाले. दरम्यान, लोकलने वेग घेताच फलाटावरील चोरट्याने माने यांच्या हातावर फटका मारला. त्याच्या हातातील 22 हजार रुपये किमतीचा मोबाईल खाली पडल्याने चोरट्याने मोबाईल उचलून पळ काढला. माने यांनी दुसऱ्या दिवशी वाशी रेल्वे पोलिस ठाण्यात तक्रार दाखल केली. 

जुईनगर रेल्वेस्थानकाजवळ रविवारी (ता. 7) रात्री पावणेनऊच्या सुमारास कोपरखैरणे ते नेरूळ प्रवास करणाऱ्या मुश्‍ताक इब्राईम शेख या तरुणाच्या हातावर जुईनगर रेल्वेस्थानकाजवळ चोरट्याने फटका मारला. मुश्‍ताकच्या हातातील 14 हजार रुपये किमतीचा मोबाईल खाली पडल्यावर चोरट्याने मोबाईल फोन उचलून पळ काढला. या वेळी लोकलने वेग घेतल्याने त्यांना काहीच करता आले नाही. सोमवारी मुश्‍ताक यांनी घटनेची तक्रार दाखल केली. वाशी रेल्वे पोलिसांनी दोन्ही प्रकरणात अज्ञात चोरट्यांवर गुन्हे दाखल केले आहेत.