Bomb Hoax in 16 Schools: मतदानादिवशी 16 शाळांना बॉम्बनं उडवून देण्याची धमकी! रशियातून आला ईमेल ? पोलिसांचं धाबं दणाणलं

अहमदाबाद : उद्या तिसऱ्या टप्प्यातील मतदान देशभरात पार पडणार आहे. यापार्श्वभूमीवर गुजरातच्या अहमदाबादमधील १६ शाळांना बॉम्बनं उडवण्याची धमकी ईमेलद्वारे देण्यात आली आहे. यामध्ये शहरातील १२ तर ग्रामीण भागातील ४ शाळांचा समावेश आहे.

सोमवारी या शाळांना धमकीचे ई-मेल आल्यानं खळबळ उडाली आहे. पोलिसांचंही यामुळं चांगलचं धाबं दणाणलं आहे. (bomb hoax threat email for 16 schools in Ahmedabad Gujarat ahead of loksabha polling)

अहमदाबादचे पोलीस सहआयुक्त शरद सिंघल यांनी सांगितलं की, अहमदाबाद शहरातील १२ शाळा आणि अहमदाबाद ग्रामीण भागातील ४ मतदारसंघातील शाळांना सकाळी ६ वाजता ई-मेल प्राप्त झाले. रशियन डोमेनवरुन त्यांना हे ईमेल आले आहेत. 'mail.ru' असं हे डोमेन आहे.

ई-मेलमध्ये काय म्हटलं?

ईमेलमधून शाळांना धमकी देण्यात आली होती. "तुमच्या शाळेमध्ये बॉम्बस्फोट होणार आहे" असा मजकूर या ईमेलमध्ये आहे. (Latest Marathi News)

सुरक्षा रक्षक अलर्टवर

या ईमेलची गंभीर दखल घेत पोलिसांनी ज्या शाळांना हे ईमेल आले तिथं कोंबिंग ऑपरेशन राबवलं. पण यामध्ये काहीही आक्षेपार्ह आढळून आलेलं नाही. त्यामुळं हा धमकीचा ई-मेल म्हणजे अफवा होती हे स्पष्ट झालं आहे. असाच मिळताजुळता मजकूर असलेले ईमेल १ मे रोजी दिल्लीतील १५० शाळांना आले होते. त्यावेळीही तपासात काहीही निष्णन्न झालं नव्हतं.

दरम्यान, अहमदाबादचे पोलीस याच्या चौकशीसाठी दिल्ली पोलिसांशी संपर्क साधला आहे. त्याचबरोबर सायबर क्राईम विभागात या प्रकरणी गुन्हाही दाखल करण्यात आला आहे.