SnapChat: मोबाईल मध्ये स्नॅपचॅट सुरू करू नको असे वडिलांनी तिला आधीच बजावले होते. मात्र तरीही तिने मोबाईल मध्ये ते अप्लिकेशन सुरू केले. वडिलांना ते समजल्यावर ते तिला रागे भरले.

वडील ओरडल्याचा राग अनावर झालेल्या 16 वर्षीय मुलीने राहत्या घरात ओढणीने गळफास घेत आपले जीवन संपवल्याची घटना डोंबिवलीत शुक्रवारी घडली आहे. याप्रकरणी मानपाडा पोलीस ठाण्यात घटनेची नोंद करण्यात आली आहे.

डोंबिवली निळजे येथील लोढा हेवन परिसरात शुक्रवारी ही घटना घडली आहे. मोबाईल मध्ये असे ॲप ओपन करून समाज माध्यमांच्या नाहक संपर्कात राहू नको असे वडिलांनी मुलीला समजावले होते. तरीही वडिलांचे न ऐकता मुलीने स्नॅपचॅट मोबाईल मध्ये गुपचूप सुरू केले. याची माहिती वडिलांना मिळताच वडील तिला रागावले. वडिल रागावल्याने अल्पवयीन मुलीला तो राग सहन झाला नाही.

रात्री तिने आपल्या राहत्या घरात ओढणीने गळफास घेऊन आत्महत्या केली. रात्री उशिरा हा प्रकार कुटुंबीयांच्या निदर्शनास आला. त्यानंतर पोलीस ठाण्यात कळविण्यात आले. याप्रकरणी मानपाडा पोलीस ठाण्यात घटनेची नोंद करण्यात आली आहे. पोलीस याचा अधिक तपास करत आहेत.