मुंबईः झोपेत चालताना सहाव्या माळ्यावरून पडून १९ वर्षीय तरुणाचा मृत्यू झाल्याची घटना मुंबईतल्या भायखळा पोलिस ठाण्याच्या परिसरात घडली आहे. मुस्तफा इब्राहिम चुनावाला असे या मृत तरुणाचे नाव आहे.

चुनावाला कुटुंबिय माझगाव येथे एका टॉवरमध्ये राहतात. मुस्ताफा याला झोपेत चालण्याची सवय होती. ३० जूनच्य मध्यरात्री मुस्तफा हा झोपेत चालत असताना सहाव्या माळ्यावरून तो खाली तिसऱ्या माळ्यावरील पोडियम स्पेसमध्ये पडला.

या घटनेत मुस्तफा गंभीर जखमी झाला होता. त्याला उपचरासाठी सेफी रुग्णालयात नेले असता डॉक्टरांनी त्याला तपासून मृत घोषित केले. या प्रकरणी भायखळा पोलिसांनी आकस्मिक मृत्यूची नोंद केली असून पोलिस अधिक तपास करत आहेत.