मुंबईतील अंधेरी पूर्व येथील पंप हाऊस परिसरात धक्कादायक घटना समोर आली आहे. गावठी दारु प्यायल्यामुळे एका कामगाराचा मृत्यू झाला आहे. तर चार जणांची प्रकृती गंभीर आहे. त्यांच्यावर जोगेश्वरीच्या ट्रॉमा केअर रुग्णालयात आयसीयूमध्ये उपचार सुरु आहेत. गावठी दारु प्यायल्यामुळे या चौघांची प्रकृती चिंताजनक असल्याची माहिती आहे. गावठी दारु पिऊन विषबाधा झाल्याने एकाचा मृत्यू झालेला आहे.

मिळालेल्या माहितीनुसार, अंधेरीतील पंप हाऊस परिसरात एका घरामध्ये पाच कामगार राहत होते. त्यांना मंगळवारी (15 ऑगस्ट) स्वातंत्र्यदिनाची सुट्टी होती. ड्राय डे असूनही कामगार गावठी पिऊन घरी आले आणि त्यानंतर झोपून गेले. त्यानंतर हे चौघे कामगार 15 ऑगस्टच्या संध्याकाळी झोपल्यानंतर काल दिवसभर त्यांनी दरवाजा उघडला नाही म्हणून शेजाऱ्यांनी पोलिसांना कॉल केला.

यानंतर एमआयडीसी पोलिसांनी घटनास्थळावर जाऊन दार उघडलं. त्यावेळी एक कामगाराचा मृत्यू झाल्याचं निदर्शनास आलं. तर चार कामगारांची प्रकृती गंभीर होती. त्यांना तातडीने उपचारांसाठी रुग्णालयात दाखल करण्यात आलं. हे कामगार 18 ते 20 वर्षे वयोगटातले असल्याची माहिती आहे.

या चौघांवर आयसीयूमध्ये उपचार सुरु असून त्यांची प्रकृती चिंताजनक आहे. याप्रकरणी एमआयडीसी पोलिसांनी गुन्हा दाखल करुन अधिक तपास सुरु केला आहे.