मुंबई - बेस्ट उपक्रमावर सध्या सहा हजार कोटींचे कर्ज आहे. तर डिसेंबर २०२२ ते मे २०२३ पर्यंत ७१२ सेवानिवृत्त कर्मचाऱ्यांची ७०० कोटींची देणी आहेत. बेस्टवर कर्जाचा डोंगर आहे.

ना नफा ना तोटा या तत्वावर बेस्ट उपक्रमाचा उपक्रम चालतो. तरीही बेस्ट उपक्रमाच्या बस प्रवाशांना व वीज ग्राहकांना अधिकाधिक सुविधा उपलब्ध करुन देण्यासाठी बेस्ट उपक्रम विविध योजना राबवत आहे. प्रवाशांना अधिकाधिक सुविधा उपलब्ध करुन देणारी बेस्ट आर्थिक संकटात सापडली आहे.

बेस्ट उपक्रमाची आर्थिक कोंडी दूर करण्यासाठी मुंबई महापालिकेने आर्थिक मदतीचा हात पुढे करत आतापर्यंत चार हजार कोटींची मदत केली आहे. तर सन २०२३ - २४ या आर्थिक वर्षात ८०० कोटींची मदत करणार आहे. तरीही बेस्ट उपक्रम आर्थिक संकटात सापडली आहे.

सेवानिवृत्त कर्मचारी, टाटा पॉवर आदींची देणी आहे. त्यामुळे बेस्ट उपक्रमावर सद्यस्थितीत सहा हजार कोटींचे कर्ज असल्याचे बेस्ट उपक्रमाचे महाव्यवस्थापक लोकेश चंद्र यांनी सांगितले. जून महिन्यात ५७८ सेवावृत्त होणार आहेत.

अधिकारी व कर्मचाऱ्यांना सेवानिवृत्त नंतर सेवावृत्तीचे लाभ मिळतात. मात्र डिसेंबर २०२२ ते मे २०२३ पर्यंत ७१२ अधिकारी व कर्मचारी सेवानिवृत्त झाले असून त्यांना ७०० कोटींची देणी देणे आहे. सेवानिवृत्त अधिकारी व कर्मचाऱ्यांची देणी लवकरात लवकर देण्यात येतील.

- लोकेश चंद्र, महाव्यवस्थापक, बेस्ट उपक्रम

सध्या कार्यरत अधिकारी व कर्मचारी संख्या

विद्युत विभाग - ५,१४३

परिवहन अभियांत्रिकी विभाग - ४,३७२

वाहतूक विभाग - १७,८९३

सामान्य प्रशासन - १,६०५

एकूण संख्या - २९,०१३