मुंबई : प्रभादेवी मंदिरासमोर (prabhadevi temple) एका अन्यधर्मीय प्रार्थनास्थळाचा (Worship place) उल्लेख असलेला मैलाचा दगड काढून टाकण्यात आला असला तरी त्यावरून मुंबई भाजप (Mumbai bjp) अध्यक्ष मंगलप्रभात लोढा (Mangal prabhat lodha) यांनी आज सत्ताधारी शिवसेनेवर (shivsena) तोफ डागली आहे. त्यामुळे हा मैलाचा दगड हलवला नसता तर हे प्रकरण चांगलेच तापले असते अशीही चर्चा आज सुरु होती. (Mumbai bjp president mangal prabhat lodha criticizes shivsena on prabhadevi temple issue)

मुंबईत मंदिरांचे स्वरुप बदलण्याचा प्रयत्न करू नये, हे खपवून घेतले जाणार नाही, असा इशाराही त्यांनी दिला. तब्बल 300 वर्षे जुने असलेल्या प्रभादेवी मंदिराच्या परिसरात एका अन्यधर्मीय प्रार्थनास्थळाचा उल्लेख असलेला मैलाचा दगड ठेवण्यात आला होता. त्याबाबत बोलताना, हे चुकीचे आहे, हे प्रभादेवी मंदिर आहे, मंदिरच राहणार, मुंबईत हे खपवून घेतलं जाणार नाही, अशा शब्दांत लोढा यांनी शिवसेनेला फटकारले. या छोट्या मैलाच्या दगडावरून सुरु असलेले हे राजकारण पुढील राजकीय डावपेचांची चुणूकच दाखवीत आहे, अशीही चर्चा परिसरात आहे.

हेमांगी वरळीकर यांनी या मैलाच्या दगडाचं अनावरणही केले होते. मात्र तीनशे वर्षे जुन्या मंदिरासमोर हे सर्व कशासाठी करण्यात आले ? असा प्रश्न उपस्थित करत लोढा पुढे म्हणाले की, त्याचमुळे या परिसरातील सूज्ञ नागरिकांनी त्यास विरोध केला. एखादी गोष्ट चुकीची असल्यास त्या विरोधात बोलणे गुन्हा होत नाही. मात्र पोलिसांनी अत्यंत उत्साहाने त्या कार्यकर्त्यांवर कारवाई केली, ही बाब चुकीची आहे. बहुदा वरिष्ठांना किंवा राजकीय वरिष्ठांना खूश करण्याचा तो प्रयत्न असावा. आता हा स्तंभ हटवण्यात आला आहे. मात्र पुन्हा असे घडले तर मुंबई भाजपा हे खपवून घेणार नाही, असा इशारा मंगल प्रभात लोढा यांनी दिला आहे.

शहरातील काही भागांचे थेट धर्मांतरण झाले असून काही भागांत ही प्रक्रिया सुरू आहे. प्रभादेवी मंदिरासमोर जो प्रकार घडला तो हळूहळू धर्मांतराच्या दिशेने जाणारा आहे. मात्र या भागातील स्थानिक नागरिक, भाजपा चे कार्यकर्ते जागरूक होते म्हणून ही बाब वेळीच समोर आली. बाजूलाच एक नवीन इमारत झाली असून इमारतीच्या परिसरात एक स्मृतीस्तंभ होता. मुंबई शहरात अनेक भागांत स्मृतीस्तंभ आहेत, परंतु त्यावरकुठेही प्रार्थनास्थळाच्या नावाचा उल्लेख नाही. त्यामुळे प्रभादेवी मंदिरासमोरही असा स्तंभ उभारण्याची काहीच गरज नव्हती. हा तुष्टीकरणाचा प्रयत्न आहे का, तसेच यात काय राजकारण दडले आहे, असे प्रश्नही लोढा यांनी याबाबत उपस्थित केले.