मुंबईः मुंबईमध्ये एका नऊ दिवसांच्या चिमुकलीचा मृतदेह पोलिसांना आढळला आहे. खड्ड्यात पुरलेल्या अवस्थेत मृतदेह सापडल्याने खळबळ उडाली असून पोलिसांनी कसून चौकशी करण्यास सुरुवात केली आहे. बाळ अशक्त असल्याने त्याचा मृत्यू झाल्याचं नातेवाईकांचं म्हणणं आहे.

'एएनआय'ने दिलेल्या माहितीनुसार चारकोप पोलिसांना खड्ड्यात पुरलेला नवजात मुलीचा मृतदेह सापडला आहे. या प्रकरणी पोलिसांनी मुलीच्या वडिलांना अटक केली आहे. हे बाळ फक्त 9 दिवसांचे होते. नवजात बाळ दूध पिऊ शकत नव्हते त्यामुळे त्याचं पोषण झालं नाही आणि मृत्यू झाला, असं पालकांचं म्हणणं आहे.

मृत बाळाचे वडील फुगे विक्रेते असून अशिक्षित आहेत. त्यांच्या म्हणण्यानुसार मृतदेहावर अंत्यसंस्कार करण्यासाठी मृत्यू प्रमाणपत्र घेणे आवश्यक असतं, हे माहिती नाही. पोलिसांनी मृतदेह शवविच्छेदनासाठी पाठवला असून पुढील तपास चारकोप पोलीस करीत आहेत.