मुंबई - सीरियातील पवित्र ‘साम-ए-पाक’ भूमीपर्यंत पोहोचू शकत नव्हतो. त्यामुळे भिवंडीसह परिसराचा सीरिया बनवण्याचा कट होता, असा खुलासा पडघा येथून अटक केलेल्या झुल्फिकार अली बडोदावालाच्या चौकशीत समोर आला आहे.

इसिस महाराष्ट्र टेरर मॉड्युल प्रकरणात राष्ट्रीय तपास यंत्रणेने (एनआयए) अटक केलेल्या आरोपींची चौकशी सुरू आहे. या चौकशीत धक्कादायक खुलासे समोर येत आहेत.

बडोदावाला इसिस महाराष्ट्र मॉड्युलचा सूत्रधार आहे. तो मुंबईतील सात रस्ता भागातील रहिवासी असून सहा महिन्यांपूर्वी त्याने पडघा येथे स्थलांतर केले. बडोदावाला वाणिज्य शाखेचा पदवीधारक असून तो गेल्या १६ वर्षांपासून अंधेरीतील आयटी कंपनीत कार्यरत आहे.

एनआयएने अटक करण्यापूर्वी तो नियमित अंधेरी ते पडघा ये-जा करत होता. मेहुणा डॉ. अदनान अली याच्या विचाराने प्रभावित होऊन त्याने सहा महिन्यांपूर्वी पडघा येथे स्थलांतर करण्याचा निर्णय घेतला.

पडघ्यातून आणखी एक अटकेत

पुणे शहरात दहशतवादी कारवाया करण्याच्या कटात सहभागी असल्याप्रकरणी एनआयएने आणखी एकाला आज अटक केली.

शमील नाचन (पडघा, ता. भिवंडी) असे त्याचे नाव आहे. बॉम्ब बनविण्याचे प्रशिक्षण आणि स्फोट घडवून आणण्यासाठी घेतलेल्या चाचणीत त्याचा सहभाग आढळून आला आहे.