Mumbai Crime: लग्नाचा तगादा लावल्याने प्रियकराने महिलेला मारहाण केल्याची घटना मालवणी येथील एमएचबी कॉलनीत बुधवारी घडली. पीडित महिलेच्या तक्रारीवरून पोलिस ठाण्यात गुन्हा दाखल झाला असून आरोपींचा शोध सुरू आहे.

एमएचबी कॉलनीत राहणाऱ्या एका महिलेचे वासिम शेख याच्याशी संबंध होते. वासिम हा विवाहित आहे. बुधवारी (ता. १५) महिला आरोपीच्या दुकानात गेली होती. तिथे जाऊन तिने लग्न करण्यासाठी आरोपीकडे विचारणा केली. आरोपीने लग्नास नकार दिल्याने दोघांमध्ये वाद झाला. तेव्हा वासिम शेख याने शिवीगाळ करत मारहाण केल्याचा आरोप महिलेने केला आहे.

त्या दरम्यान, वासिम याची आई, बहीण आणि पत्नी त्या ठिकाणी आल्या. त्यांनीही महिलेला मारहाण केली. या घटनेची माहिती मिळाल्यानंतर पीडित महिलेची आई तिला वाचवण्यासाठी आली असता तिलाही मारहाण करण्यात आली. त्यानंतर महिलेच्या भावाने तिला जखमी अवस्थेत रुग्णालयात दाखल केले, अशी माहिती पोलिसांनी दिली. याप्रकरणी गुन्हा दाखल झाला असून पुढील तपास सुरू आहे.